為咗說服甄子丹演出《葉問》第四集，黃百鳴話畀咗個天價子丹。資料圖片
每年暑假，甄子丹都會同老婆仔女一齊去旅行，今個暑假佢就同老婆、大女兒Jasmine去咗意大利旅行，呢幾日佢都有喺微博發放旅遊相，留言話：「個女又高大咗。」子丹又話充完電返嚟又要開始搏殺。聽講如果黃百鳴監製嘅《葉問4》劇本順利搞掂，年底就會開拍，今次第4集投資肯定俾之前3集大，點解？因為單係子丹就攞咗1億港幣片酬。
喺意大利旅行叉電嘅甄子丹，呢幾日都有晒旅行相。微博圖片
寫緊劇本
相信好多人都冇辦法相信呢個價錢，會認為係吹水，但實情又真係有老闆肯俾呢個天價佢，黃百鳴同王晶兩個就最鍾意抬高演員片酬，佢今次為咗說服子丹再拍第4集畀到1億片酬，等佢完全冇法抗拒。呢個價錢簡直係破晒香港所有演員嘅片酬紀錄，連周星馳、周潤發、梁朝偉、成龍同李連杰都未攞過咁高片酬，不過馮仁昭就覺得子丹收咗呢個價錢之後，以後點呢？到底有幾多片商肯俾呢個價錢佢拍戲！
頭先打俾黃百鳴問佢係咪真係畀1億片酬子丹演《葉問4》？佢話：「公司確實係畀咗個天價子丹，但肯定唔止你講嘅數，但實際幾多就唔方便講。部戲𠵱家已經寫緊劇本，故事會點發展，等劇本出嚟之後先會知道。」聽講第4集故事係講老年葉問畀三仔葉少華繼承自己嘅武學傳統，同徒弟李小龍一齊將詠春拳發揚光大。
撰文：馮仁昭
from:
http://hk.apple.nextmedia ... 170719/20093949
