好似Honda Stream同Toyota Wish咁樣造型嘅MPV，其實好受年青人歡迎，一來實用性高，二來又唔會好似Stepwgn咁高頭大馬，冇曬操控趣味。但Honda兩年前已將Stream停產，再以六座位嘅Jade入替，受歡迎程度即時唔同曬。筆者早前向代理借用Jade三日兩夜，嘗試發掘佢出色一面為佢平反，其實唔好當佢係Stream入替車，成個feel會唔同曬。
車身有Jazz影子，而且比一般MPV更低重心，係好操控嘅基本條件。
Honda Jade RS Spec.
引擎：1,496c.c.直四turbo
馬力：150ps/5,500rpm
扭力：20.7kgm/1,600-5,000rpm
傳動：無段變速自動、附+/-模式
車身：4,650×1,775×1,530（mm）
軸距：2,760mm
車重：1,514kg
耗油：18.1km/L
車價：$276,880
查詢：Reliance Motors（2827 8622）
其實係旅行車
好多人將Jade定性為MPV，但咁樣其實好錯，因為Jade根本似一部旅行車多過MPV。首先，Jade嘅車身形態似Stream又似Jazz，已說明兩點：一）有Stream嘅車廂實用性；二）有Jazz嘅駕乘感受。先講講Jade嘅車廂，佢同Stream一樣用三排座位佈局，不過分佈為2＋2＋2，即全車只載六人。我老媽子聽到佢只載六人，第一個反應係：「乜少咗個位咁唔方便？」然而試車多日，根本未試過坐滿六人，莫講話七個人。由此可證明，不少所謂MPV用家，用盡全部座位嘅機會唔多。Jade嘅六座佈局，正常情況下中排留有一條小走廊，用意係令狹小嘅後排多一個出入方法及使中排兩個座位有獨立空間，但中排座位用咗固定式手枕就比較阻地方，進出後排時其實有啲阻礙，試車多日只有筆者七歲大姪仔喜歡自出自入後排，而事實上只有小朋友先坐得舒適。
Jade嘅中排係全車焦點，當全車只載四人時（其實大多數MPV都只載一家四口），載過每位中排乘客都樂於將座位拉至最後，移後時「V形」路軌發揮作用，巧妙避過後輪拱，今中排背可以貼盡後排以獲取最大腿部空間，中排乘客伸直腳都未必掂到前座椅背！當使出呢個座位設定時，後排就等於冇用，所以廠方醒目地將後排設計成可以完全平坦摺疊於地台底，騰出巨大尾廂，就同旅行車一樣，唔載六人時，就當佢係四座位旅行車吧。
前座都算幾高級，紅線縫製兼用透氣真皮，而且難得兩張前座都有電動調校及電暖功能。
正常模式下，中排係兩張望落相當高級嘅獨立座位，中間留有小走廊，但用固定式手枕，其實幾阻地方。
後排空間頗狹窄，成年人坐得辛苦，但小朋友就好like呢類獨立空間。
中排嘅「V形」路軌，可以令中排後移時避過後輪拱，得出更好腿部空間。
後排早預咗係臨時性質，所以可以完全摺平，騰出巨大尾廂，比旅行車更實用。
車廂佈局高級，有Odyssey嘅影子，不過有一個未追得上潮流嘅缺點，就係全車都冇預設USB插槽，用家必須用轉換器由電源插取電。又似係揭背車
現時Honda大力推動細容積turbo引擎，大如Stepwgn都用1.5公升turbo引擎，Jade早喺兩年前已經採用，150匹馬力及20.7kgm扭力唔算好勁，但配喺Jade上，卻與Stepwgn有截然不同效果。用車多日發覺引擎運作聲唔細，而且因為用上無段變速波箱，令加速感受少咗一份爆炸力，要好啲就一定要用＋/-模式，不過筆者認為Jade嘅重點不在於引擎或波箱，因為Jade嘅重心非常低，完全唔會有Stepwgn一類大車嘅轉彎時車身大幅度傾側，而廠方亦早為Jade預設軚感敏銳嘅電軚系統及AHA（Agile Handling Assist）系統，可個別為內彎嘅前輪作輕微制動，令入彎動作更sharp、更快！所以Jade嘅駕駛感受其實好似一部短軸距嘅揭背跑車，同廠Jazz都可以企埋一邊，有久違了嘅Honda跑車熱血味。
試車多日嚟，主要以正常使用模式用車，只偶爾催谷一下，全時間都著住冷氣，共行258.9km，以行車電腦計算平均耗油為7.8L/100km，如以冇折扣汽油價格計算，即約$1.17/km，表現實在唔差，用埋折扣卡分分鐘$1/km。
波箱為無段變速款式，配合埋停車熄匙系統及細容積引擎，達到慳油效果。
7速＋/-模式只可於軚盤操作，而且一定時間內會自動切換回自動模式。
鮮紅色Engine Start/Stop連Type R車系都用佢，靚仔曬！
試車共行258.9km，平均耗油7.8L/100km，當佢係MPV或Wagon都好，都相當慳油。
同Stepwgn共用同一台引擎，150匹馬力比一般小房車強勁得多，唯高轉運作時噪音頗大。
撰文：袁國基
攝影：葉偉豪
