何超雲自從一三年同陳山聰分手之後，就一直都係單身，努力幫阿媽三太陳婉珍打理生意，連三太都忍唔住力讚超雲，話佢工作勤力又有上進心。
o依家，超雲只要唔使返工就會煮嚇嘢食，同埋寄情三隻愛貓，留喺屋企做貓奴。不過，玩得貓多都會悶，日前，東姑就發現dry到爆的超雲，約下午五點，專誠落時代廣場搵做緊宣傳活動嘅阿妹超蓮，兩姊妹雖然都只係著咗白色T恤，但係企埋一齊，相當吸睛。活動完畢後，佢哋漫無目的喺銅鑼灣打圈，乜都睇一餐；期間，超雲似乎想物色新寵物，於是拉咗超蓮去景隆街一間寵物店睇狗仔。
入到舖頭，超雲立即畀一隻金啡色嘅細狗吸引住，佢抱上手唔捨得放開，又捉住場內職員詢問飼養方法，希望瞭解更多，做個負責任嘅主人。兩姊妹愛心爆棚，見到每一隻可愛嘅小狗，都忍唔住要望多兩眼。大約睇咗二十分鐘，超蓮聽咗個電話，就同家姐講要離開，跟住跳跳紮獨自走。而感到非常冇癮嘅超雲，惟有由司機接返何家大宅。查實，超雲又索又有愛心，要搵個好男人絕對唔難，只係緣份未到啫！
何家三房嘅兩位千金，超雲同超蓮企埋一齊，即時成為全場焦點，吸睛度爆燈。
向來著衫都好有品味嘅超雲，呢日就非常前衛，著咗件疑似粗口嘅T恤。
姊妹情深，超蓮見超雲咁悶，活動完咗之後，就陪佢周圍逛街消磨時間。
超雲似乎想再添新寵物，於是捉咗阿妹入寵物店睇狗仔。
