郭富城噚日去戲院謝票時，豎起手指公希望《寒戰II》破票房紀錄。
郭富城、梁家輝與周潤發三大影帝主演嘅《寒戰II》上咗16日，截至前日香港票房已約有5,550萬，內地就收約6.45億。城城噚日同兩位導演陸劍青、梁樂民去咗觀塘apm戲院謝票，喺現場同觀眾玩遊戲兼送小禮物。因為票房已經過咗今年本地華語片冠軍《美人魚》嘅5,523萬紀錄，同開埠以嚟嘅華語片票房榜首《那些年，我們一起追的女孩》保持嘅6,185萬票房紀錄，《寒》只係差635萬，如無意外，呢個禮拜就有機會刷新票房紀錄，成為新王者。
由三大影帝主演嘅《寒戰II》，好大機會成為歷來華語片票房冠軍。
兩位導演陸劍青、梁樂民，仲同城城一齊同觀眾影大合照。
城城話歡迎劇組踩台，一齊喺演唱會中慶功。資料圖片
導演提議踩台
部戲有機破華語片票房紀錄，身為男主角嘅城城同兩位導演去戲院謝票，當然係想再催谷下票房。講真好多香港影人都覺得香港華語片票房冠軍俾部台灣片霸咗咁耐，又的確好冇面，佢哋都希望《寒戰II》幫香港片爭番啖氣。
噚日問城城希望票房收幾多？佢話：「想破紀錄先，唔好諗幾多，一蚊都係破。希望未睇嘅巿民去捧場，大家合力破紀錄，之後我要投入演唱會綵排。」
待破票房紀錄，電影公司會搞慶功，陸劍青同梁樂民話有可能喺城城演唱會期間踩台，城城聽到笑笑口話：「慶功就喺演唱會搞，12場演唱會隨時歡迎踩台。」兩位導演就表示稍後會旅行充電，再構思係咪拍續集，希望有新演員新火花，仲講笑話：「大家老婆都投訴，話我哋成日一齊，問我哋係咪基！」
撰文：馮仁昭
from:
http://hk.apple.nextmedia ... 160725/19708335
