江美儀現身樂視有麻煩

江美儀最為人知嘅感情生活，就係有一個拍拖11年幾嘅男友吳君如胞弟吳君祥。

吳君祥比江美儀大4年，彼此互相以「BB」稱呼，二人關係尤如老夫老妻，江美儀嘅父母都視君祥好似半邊仔咁。

其實江美儀緋聞一向唔多，只係聽佢喺專訪講過自己喺未同吳君祥一齊之前，曾經有一段戀情，令佢有好大教訓。江美儀覺得失敗原因係太遷就前度，對方更加肆無忌憚，最終江美儀喺戀愛中失去自己，就係呢段經歷令江美儀認為一紙婚書，並唔能夠證明啲咩，所以其後佢同吳君祥拍拖兼同居，都冇計劃生B同結婚。

不過2012年爆出吳君祥趁江美儀飛巴黎拍劇，疑偷會中女嚴淑明，喺夜店咀嘴，江美儀最後回應「當男友應酬」就算，力證情不變。佢哋又真係冇事，繼續人前晒恩愛。直到今年初爆出吳君祥因長居內地，兼喺北京開製作公司，同江美儀聚少離多，感情亮紅燈，江美儀更表示已有心理準備男友可能發展新戀情。
from:http://hk.apple.nextmedia ... 170806/20112986

亞視出身嘅江美儀，喺13年憑《衝上雲霄II》拎咗「最佳女配角」獎項之後，從此就是非連環爆，幾乎係有佢演出嘅電視劇、綜藝節目，甚至舞台劇，是非總係同佢連成一線。

捱咗16年嘅江美儀終於有機會喺新劇《親親我好媽》擔正做女一，點知有傳佢對劇本諸多要求，趁曾勵珍放大假嗰陣，越級向杜之克投訴，結果搞到要停廠四日大執劇本，監製關永忠搞埋啲套劇嘅後期執包袱走人。江美儀雖然一口話冇件咁嘅事，又話珍姐叫佢唔好為呢啲無中生有嘅事唔開心。不過咁啱得咁橋，佢喺拍劇方面又靜咗一排。

是非仲漫延去舞台劇《嬉春酒店》，有傳女主角之一嘅江美儀，有一日等齊全體演員到齊排戲嗰陣，就當住所有人面前質問監製，話「條數唔係咁計，咁你交代清楚！」再有指佢拖欠中介嘅介紹費，到再次公演嗰陣，美儀不見了。事後佢話可能係說話冇尾音，事件只係誤會。

冇得拍劇咪改投余詠珊做綜藝，江美儀同麥包麥長青、滕麗名同顧紀筠個囝囝陳浚霆拍綜藝節目《街市遊樂團》，江美儀喺節目狂鬧做下把位嘅陳浚霆，跟住又話魚檔劏魚每日賺得嗰260蚊，又話剝蝦曬蝦乾係自甘墮落，結果江美儀俾網民狂插刻薄兼睇低人。江美儀事後接受周刊訪問，話反省到自己有錯嘅地方，語氣或態度過咗火得罪人，於是佢向大家衷心致歉。

而近日就有傳江美儀拍《誇世代》，大家姐上身教後輩拍戲。
from:http://hk.apple.nextmedia ... 170806/20112985