謝安琪昨日指歌曲《山林道》內容講毋忘初衷，美國海軍揀唱這首歌令她好感動。資料圖片
美國海軍大前日訪港到迪士尼樂園，一位女軍在其他軍人的樂器伴奏下，用廣東話唱出謝安琪（Kay）的歌曲《山林道》，吸引大批遊客圍觀，短片在網上瘋傳，有網友激讚：「起咗雞皮」、「犀利！美軍都唱，大陸人學嘢啦！」、「唔好話舔美國人鞋底、崇洋，但人哋真係有修養，懂尊重。」、「對鬼婆來講，廣東話真係好難學，可見佢真係好有心機。」
大前日美國海軍訪港到迪士尼，女海軍對著歌詞拼音努力唱廣東歌。
海軍人員用不同樂器，伴奏出《山林道》，吸引大批遊客圍觀。
「一定係鍾意」
之前韓國女歌手IU唱Kay的《囍帖街》，今次輪到美國海軍揀唱《山林道》，有網友指Kay已經衝出國際！Kay昨接受《蘋果》電話訪問表示：「嗰日有喺迪士尼做嘢嘅朋友，咁啱on duty拍低畀我睇，我其實好開心，因為覺得有任何喺外國嚟到嘅音樂人、樂團、歌手，佢哋如果喺本地挑選作品演繹，一定有佢哋自己原因，要花咁多時間演繹一首歌，一定係鍾意嗰首歌，覺得嗰首歌值得佢哋咁做。」
所以，Kay睇完這條片覺得好「滾動」：「知道自己嘅歌曲畀呢隊海軍樂隊演奏，咁認真拼曬音去唱，好感動！第一時間send畀《山林道》製作團隊分享喜悅，我覺得意義最緊要。我諗佢哋有問嚇人，如果我要演繹一首唔識語言嘅歌，我都會問嚇當地人，知道首歌講乜嘢，我先夠膽演繹，要知道情緒點演繹。呢首歌講面對困境或者發展時候都毋忘初衷，講緊呢啲咁社會性心態，我好欣賞佢哋揀一首咁樣故事嘅歌去演繹，好多謝佢哋。」
Kay拍劇瞓身演出卻無助收視。
Wyman藉機宣傳
至於《山林道》的填詞人黃偉文（Wyman）就此透過短訊回覆：「嘩，原來廣東歌熱潮已經傳播到美國了嗎？可以期待下一步是Beyonce和Rihanna在Super Bowl中場表演合唱《女神》（鄭欣宜主唱）嗎？請她們務必記得帶埋欣宜。」
另外，Kay擔正演出的大台劇，雖然她曬長腿卻無助收視，前晚Kay在fb打千字文狂sell，但最令人注意的是她「波濤胸湧」的瞓身演出，獲得網民大讚！
採訪：皓騫
from:
http://hk.apple.nextmedia ... 160504/19596498
