由林保怡和周家怡孭飛的ViuTV開台自家劇《瑪嘉烈與大衛系列綠豆》，將於今晚11時強勢首播，不但開創煲劇新時段，更為打破過去膠劇陳腔濫調的框框，幕後班底大膽起用從未拍過劇集的廣告界精英操刀，用人夠創新，至於籌拍中的《三一如三》實況處境劇，更用80後新晉導演兼監製，為近年悶爆的電視界帶來新衝激！
《瑪嘉烈與大衛系列綠豆》ViuTV今晚11:00首播
新一代年輕觀眾嫌棄無線拍膠劇，令電視節目千篇一律，新免費電視台ViuTV為尋求突破，台前幕後都大膽起用新人。今晚首播的ViuTV自家製劇集《瑪嘉烈與大衛系列綠豆》便由一班廣告幕後精英負責，就連播映時段都好破格，沒有打正旗號在黃金時段播出，反而選在晚上11時。該劇男主角林保怡昨接受本報記者訪問，他說：「呢部劇同以前好唔同，我都要重新適應，好似黑板咁，以前寫嘅嘢抹曬佢，從頭再學一次，好玩，好有挑戰性。」問是否太過大膽？他說：「創新係要嘅，但我唔覺得係大膽。」而女主角周家怡昨在電話說：「希望call到一班唔睇電視嘅觀眾嚟睇，佢哋平時睇開網劇，或其他國家劇集，希望睇我哋呢套。」家怡大讚ViuTV敢於創新：「拍得好開心，所有嘢都執得好細緻，套劇嗒落有味。我承認佢哋拍攝手法係好唯美主義，但都係以戲行先，睇番我都眼濕濕。」
周家怡大讚《瑪》劇拍得細緻，她亦希望能吸納一班新觀眾。資料圖片
街頭歌手黃劍文負責唱《瑪》劇主題曲《我們的》。資料圖片
大膽用街頭歌手
《瑪》劇導演Fatball和25拍廣告出身，Fatball昨日在電話中感激ViuTV給予機會，他說：「之前拍咗《瑪》網劇版，作者南方舞廳同金生（金廣誠）又覺得幾得意，𠵱家變咗30分鐘劇集，我哋都想大膽啲，以廣告拍攝手法去拍劇，做出嚟嘅嘢一定要靚，我哋亦唔會用罐頭音樂，搵咗音樂人許創基做，令視聽觀感耳目一新。」25則說：「ViuTV真係一個好肯創新嘅電視台，香港多一個平台，對創作人嚟講係好事，大家可以有新思維。」就連主題曲《我們的》都是用街頭歌手黃劍文主唱，黃劍文昨說：「Viu喺ifc條橋執我返嚟，好大膽。非常感恩有呢個機會，仲要同林若寧合作，好勁呀！」
緊接《瑪嘉烈與大衛系列》，ViuTV正籌拍另一部新劇《三一如三》，除了老戲骨盧海鵬和溫碧霞，還起用新模袁澧林（Angela）、Gladys Li等新演員，據悉身兼監製及導演的陳志發只得27歲。
鵬哥、溫碧霞等拍新劇《三一如三》，該劇80後導演陳志發希望故事能讓觀眾共鳴。資料圖片
《三一如三》導演陳志發
無線舊將闖新路
陳志發曾於2013年在無線任職promo導演，他昨在電話中說：「我喺浸會大學電影傳理系主修電影電視，喺TVB做咗一年，見到入面唔少師兄師姐升到某個位就係咁，好似foresee自己將來條路，係咪要每年離不開拍台慶、華姐、節目巡禮promo呢？所有嘢每年一樣，我問自己『係咪咁樣就一世，你想唔想先？』」最後他創作首部電影《點五步》獲政府資助200萬元開拍，初嘗做導演滋味，他說：「《三》係我首部執導電視劇，希望可以拍貼地啲，令觀眾有共鳴。」
鵬哥表示不怕與新人合作，他說：「新舊人都冇所謂，一樣咁拍，我哋拍嘢周不時都同新人合作。」而ViuTV製作總監金廣誠認為行業需要新血，他說：「我當年好年輕就被委以重任拍《季節》，都係多得吳雨畀呢個機會我，到𠵱家我梗係要畀番機會新人。」
採訪：嵐山、皓騫、陳傑
【跳出框框】ViuTV自家劇真夠膽
時段夠破格
逢週一、二的11時至11時半播自家劇，開創非家庭主婦煲劇時段，針對年輕觀眾放工後鬆一鬆，真正對準新一代觀眾。
非連貫劇情
拋開以往電視連續劇的框框，《瑪》劇和《三》劇的劇情都非連貫性，反而是跟章節和主題而拍攝。
演員新面孔
《三一如三》劇集中，出現嶄新面孔做重要角色，分別有做開模特兒的素人袁澧林（Angela），亦有本身做廚師的楊尚友擔正要角。
幕後用新人
兩齣自家劇，《瑪嘉烈與大衛系列綠豆》起用拍廣告和MV起家的Fatball和25，而《三一如三》更大膽用80後新人陳志發任導演和監製。
from:
http://hk.apple.nextmedia ... 160411/19565952
