鄧健泓在無線工作20年，終於都要離開勇闖新天地。攝影：陳俊強
鄧健泓2005年離開無線，07年因經濟拮据，當時無線總經理陳志雲向他招手，其後被指「空降」回巢，成為「迷雲黨」員，還以為他可以扶搖直上，怎料負評如潮，被網民鬧至體無完膚，當陳志雲失勢之時，週遭的人即一沉百踩，令他自信全失，更險些患上抑鬱症，幸好一次演出機會，令他重拾自信。上週四鄧健泓跟無線結束20年賓主關係，一直被無線視為棄將的他，最後未有選擇投靠恩師陳志雲加入商台，因他不想重蹈覆轍惹來閒言閒語，下定決心靠自己創出新天地。
撰文：非非
鄧健泓離開無線五日，感覺如釋重負，日前他在觀塘接受本報專訪時，第一時間開心分享離巢第一擊，就是大後日公演的舞台劇《走婚》，問他離開無線的感覺，他淡淡然說：「每樣講緣份，我諗我同呢間公司緣份完咗，我應該話對呢間公司已經冇感覺，其實近呢兩年，我都係做自己嘢，搞自己製作公司，夾band，做舞台劇，三、四年不停自己搵工作，只係交代畀公司，所以我心理上已經好ready離開。」鄧健泓簽經理人合約，慘被投閒置散，他苦笑說：「如果TVB係有畀機會我嘅話，哪怕係一個好細嘅角色可以發揮，我都好心滿意足。」
鄧健泓當年幫張敬軒（左）做演唱會嘉賓，讓他獲得重生的機會。資料圖片
鄧健泓視陳志雲是親人、是哥哥，去年志雲判刑當日，他希望身體力行支持對方。資料圖片
被鬧樣衰感受傷
1996年加入無線，2005年鄧健泓曾離巢外闖，2007重返無線，被冠以「迷雲黨」，他說：「07前我拍一個內地劇收唔到錢，當時我真係好亂，因為我係家庭支柱，咁我冇曬錢，又喺北京拍緊嘢，佩華姐（無線藝員科）打電話嚟，陳志雲又打嚟話『TVB會歡迎你返嚟㗎！』當年我返到去，所有人都覺得我係黃馬褂，所有人都唔記得我之前好努力咁做。只要陳志雲話幫我就戴咗好多有色眼鏡望我，大家唔記得我前嗰八、九年，我係用我嘅能力生存，當我冇咗啲機會，有個貴人喺我身邊出現，我梗係開心喇！但換來係好多指指點點、閒言閒語、是是非非，令到我好冇自信心，我記得我連最基本嘅自信心都冇，變到好似乜都唔識，個個都喺度話我，幾難聽嘅說話我都聽過，例如『你樣衰到咁你唔好做戲喇！』『嘩！你得唔得，你唔得你X啦！』好難聽嘅說話，我真係hurt到。」
被視為迷雲黨的鄧健泓飽受壓力，工作量開始銳減，加上一直積壓的負面情緒，他開始出現抑鬱症狀，他說：「我又冇睇醫生，但我係會唔開心，有啲病徵係冇自信心，好似唔識做戲，覺得所有人唔鍾意我，唔敢出場，但我開始明白，我嘅工作都係為咗生活，由Day1開始我要support我屋企。」幸好鄧健泓在張敬軒演唱會出現了一次重生的機會，他擔任嘉賓，獲得全場掌聲，令他重新釋放自己。
陳志雲對鄧健泓照顧有加，卻又令他陷入是非漩渦，鄧健泓有否後悔成為迷雲黨？他意志堅定說：「冇，我諗呢啲全部係緣份，全部都係機緣，如果我當時唔去把握，我屋企可能已經冧咗，我冇錢到連家用都畀唔到阿媽，出街都唔敢出，真係有得必有失，你話係咪介意，開頭我真係好介意，以前從來未試過咁多人唔鍾意我。」
陳志雲（右）07年叫鄧健泓回巢，從此鄧就被視為迷雲黨。資料圖片
離開無線後，鄧健泓緊接演出舞台劇《走婚》，跟舞台劇演員劉至芝合作。
借Honey謝陳志雲
重提陳志雲是Honey一事，鄧健泓表示從此之後不敢講「honey」：「當年我去查小欣個訪問，佢畀咗好多食物列咗出來，揀到李詩韻我冇理由公開戀情話佢係蜜糖，所以我話佢係水，到最後得蜜糖同檸檬，陳志雲我就話佢喺蜜糖，因為蜜糖係有療傷嘅功能，我冇嘢做時佢拉我返來TVB，我生活可以返去正常嘅軌道上面，我可以療傷，佢就畀到個療傷作用我，完咗方力申打畀我，話我答得好好，之後有報導就話鄧健泓認叫陳志雲做honey，呢樣嘢就流芳百世。」
攝影：陳俊強
from:
http://hk.apple.nextmedia ... 160315/19529217
