喺大台孭得飛嘅花旦走一個、走下又一個，如果你屋企嘅公仔箱，因為家人而慣性常開，就會發覺啲女一角色，睇嚟睇去都係啲新晉力谷小花陳凱琳、蔡思貝等，即係連演技都唔可以叫好嗰啲，大台力谷仲有李佳芯同陳瀅，好似大台近日播《潮流教主》，講陳豪做時尚雜誌總編輯，帶領旗下一班女職員搞fashion，似就似係玩新嘢!
不過啲劇情又係抄日劇《First Class》，當中被網民封為「世紀煩音達」嘅蔡思貝，亦繼續做一啲熱血努力角色，唔少網民都覺得佢慘被大台「定型」，就好似幾個女演員演開被強姦嘅角色，就長期喺劇中被姦，認真夠曬悽涼，認為蔡思貝可以演啲cool嘅角色。
昨日有週刊稱大台劇《潮》係抄兩年前嘅日劇《First Class》，呢套日劇第二輯上年更喺J2台播過，蔡思貝演嘅「張逸寧」仲同《First Class》女主角「吉成千奈美」澤尻英龍華好似，又係講一個打扮好娘嘅女仔入行，喺最top嘅潮流雜誌社，點被公司啲人恰，個人點上進，角色同劇情都大致相同，報導更指，有一集更加離譜，連劇情都一樣，講有個model甩底，要臨時搵人頂上做model，蔡思貝著嘅背心裙，仲要同《First Class》嘅吉成千奈美差唔多款
拍攝當中亦加咗好多內心劇嘅位，不過唔係用眼神去交代，而係用內心對白去演，呢個都係日劇最常用嘅手法，大台o依家先抄嚟當新嘢遲唔遲啲，另外，陳豪喺劇中成日叫啲下屬去天台，《First Class》亦有唔少重要場景喺天台拍攝噃!
角色當然唔止抄一個喇，楊秀惠演嘅富二代角色都有「藍本」就係喺《First Class》由菜菜緒演嘅「千金高層」，又係女主角吉成千奈美嘅死敵，咁啱楊秀惠喺劇中又係蔡思貝嘅死敵，就係撞都冇咁橋!
不過，成套劇最多人彈嘅係陳豪演戲，造型明扮時裝界名人「老佛爺」Karl Lagerfeld，咁陳豪本身夠高，絕對係model底子，但唔係「教主」feel，有網民覺得個角色如果由黃子華去演一定更好。
from:
http://hk.apple.nextmedia ... 160304/19516176
