現年25歲嘅龐景峰（Andrew），不時傳出夜蒲兼緋聞，但自從舊年簽咗畀韓國公司正式出道後，就經常陪媽咪郭秀雲出席活動，母慈子孝建立乖乖仔形象。
不過早排自稱單身嘅佢，前晚約10點就俾本報記者影到同一個妙齡少女，喺大坑浣紗街一間食日式串燒嘅食店撐枱腳。記者事後發現嗰位少女原來係兩年前曾退選港姐、舊年轉戰國際小姐、芳齡22歲兼有「𡃁版栢芝」之稱嘅楊埕（Sabrina）。小情侶一路食一路傾，到11點半都未捨得走，連食店打烊、班員工換曬衫企喺門口等佢哋都唔知。最後Andrew埋單走人，同女友十指緊扣咁喺附近拍拖散步。仲行到出馬路中間。
【打烊先走】
景峰同楊埕前晚喺居酒屋食到人哋打烊，要食肆員工企曬出門口歡送佢哋。
【關注樓巿】
小情侶睇樓盤廣告，唔知係咪有意築愛巢。
【陪等巴士】
Andrew送女友上巴士就閃人，女仔人家危險嘛，下次唔好啦！
Sabrina（右一）喺1月尾現身男友所搞嘅活動，當時Andrew媽咪郭秀雲（左一）都在場。資料圖片
送女友坐巴士
佢哋散步期間，途經一間地產舖見到樓盤廣告，Andrew同女友對住櫥窗指手劃腳，記者聽到佢同女友講解話：「呢個單位咪喺呢度囉！」隨即指一指附近一棟大廈，似有意入市或租樓盤。雖然啱啱食完串燒，但Andrew可能未夠飽，佢之後帶咗女友去天后食甜品，食完就陪女友到巴士站等車，等女友上車後，Andrew就截的士返屋企。
記者見Sabrina落車返大圍寓所時，路經一條黑麻麻天橋都要兩頭擰急急腳行。話曬夜深人靜，加上最近有當街斬人事件，下次Andrew最好畀番啲gentleman風度出嚟，送到女友返屋企門口，咁先萬無一失嘛！
採訪、攝影：畢紹基、朱志聰
from:
http://hk.apple.nextmedia ... 160301/19510748
