王浩信拍劇出事腦震盪失憶

王浩信同老婆陳自瑤（YoYo）前晚突現出現喺屯門醫院，讀者謝小姐透過本報「爆相爆片」報料，話當時10點幾，見到戴住口罩嘅YoYo同囡囡到咗急症室，王浩信左額就貼咗紗布。謝小姐指其後有人到場，幫YoYo接走囡囡，YoYo就同長輩留多咗一陣。

出院留家休養

據知王浩信前晚為無線劇集《致命復活》開工，但不幸發生意外，有指當時佢喺車上拍攝爭執打鬥戲份，並冇爆炸場面。王浩信噚日喺微博貼相報平安，其中一張係佢頭部包紮咗，臉容憔悴，左臉頰有紅印兼微腫，另一張係左額貼咗十字紗布，仲同老婆一齊戴住口罩以「OK」手勢報平安。王浩信留言話：「像拍戲一樣，失了點記憶，救護車送往醫院檢查，不幸中大幸，頭及臉上只是皮外傷，沒傷到腦部及骨，意外時輕微腦震盪，手指需要縫針，其他一切還好！先報平安！」

王浩信以「OK」手勢報平安。微博圖片

YoYo知道老公出事，憂心忡忡去到醫院。

讀者提供圖片
王浩信接受傳媒查詢時話：「其他一切還好，沒有留院，選擇在家中休養，希望盡快康復，多謝關心！」YoYo都好擔心：「昨天收到電話都嚇死！好彩冇大礙，佢今日好些了！頭部還有些痛，有心，可能要休息一個星期，要再看一看情況。」

同劇郭晉安表示已致電慰問，另一位對手萬綺雯雖然啱啱病好，但佢話可以先跳拍：「聽講佢眼皮要縫針，希望唔會留疤痕，佢始終青靚白淨，叫佢問多啲醫生意見。」

撰文：馮仁昭
from:http://hk.apple.nextmedia ... 160223/19501591

王浩信上月底拍劇受傷，噚日獨自入院做檢查。

王浩信左額傷口腫如乒乓波，佢話左眼睇嘢仲係矇查查。微博圖片
王浩信上月21日為拍無綫劇集《致命復活》一場車上爭執打鬥戲不慎受傷入院，佢出院留家休息幾日，近日為趕戲頂硬上復工，由於拍嘅係受傷戲，都唔使點化妝，實行戲假傷真。噚日下晝5點幾，馮仁昭發現王浩信一支公出現跑馬地養和醫院辦理入院手續，據知佢因為受傷未好再入院照磁力共振做徹底檢查。

有指出事當日劇組超時拍攝，為慳4,000蚊替身OT錢，導演叫王浩信親身上陣才發生意外，佢事後淡化事件只稱輕微腦震盪同手指縫針。

落樓梯企唔穩

噚日王浩信戴住頭箍同黑色口罩、孭背囊現身養和，一臉憔悴，佢左額受傷位置腫到乒乓波大，左眼眼窩有瘀痕，當護士陪佢落樓梯去搭𨋢時，王浩信仲出現步履不穩，精神狀況好差。

馮仁昭噚日短訊問候王浩信，佢回覆：「左額仲未消腫，左眼睇嘢有啲矇，所以入院check下，多謝關心。」老婆陳自瑤因為開工未有陪伴，據知王浩信今日出院又要為即將推出新劇《EU超時任務》拍宣傳片。王浩信噚晚入院後貼微博，其中一張相係前晚拍醫院戲造型，佢留言：「頭上有血是昨晚的醫院戲，今天又來到真正的醫院做檢查，我和我的角色Max開始分不清。」

撰文：馮仁昭

馮仁昭
from:http://hk.apple.nextmedia ... 160302/19512135