除咗普通電油版之外，新Sienta仲有hybrid版，1.5公升偈配摩打，綜合馬力100匹，耗油量低到27.2km/L(約$0.56/km)。陀地就算未正式入過行貨，但都可以好賣到裂嘅迷你7座MPV Sienta，威在車仔細細就有7個位，而且佢最後排凳叻在空間合理，唔用時仲可以收喺地台，加埋癲慳1.5公升細偈同Toyota個金漆招牌，新車差唔多壟斷曬小家庭MPV市場。由03年出到今日賣咗12年嘅Sienta，喺上個禮拜Toyota終於幫新車推出第二代。
新一代繼續用返上代嘅必勝7座雙電趟門formula，但更勁嘅新樣會破天荒用two-tone色嚇你一驚，勁似同廠Prius C變大版。有5座同7座選擇嘅新Sienta，車身同軸距分別長過上代100mm同50mm。換咗新款編號2NR-FKE引擎，波箱仍然用CVT無段變速，最大馬力有109匹，耗油量係20.6km/L(約$0.75/km)。
車內總長度有2,535mm，又係拍得住大佬Wish嘅size。
新車籠design其實好似Wish，特別係個好racing嘅平底軚盤。
喺日本Sienta齋版售價由10萬5港幣（未連稅）起，頂級hybrid版由14萬港幣（未連稅）起。陀地車迷好快會見到真車，因為已有網友影到新車喺香港出現。
