學生時期有好多集體回憶，當中一定唔少得成班同學仔一窩蜂搶購的潮牌！80後男校生愛著York褲、Dr.Martin皮鞋；女仔就梗唔少得一個靚靚地圖袋啦！仲有無印啲鐵筆盒、鐵間尺，唔好話你冇跌過落地嘈住Miss講書呀！ 徐淑敏 恨買地圖袋
學生時期最愛地圖袋（Alviero Martini）！嗰時好多女仔都會孭地圖袋返學，我當時對品牌冇乜idea，淨係覺得好多人用、好靚，不過我冇錢買，所以冇考究個價值，但就深深印喺我腦海裡面，地圖袋就等於我嘅學生時代！
羅霖 阿仔愛Jordan我個年代冇乜潮牌，因為大家生活比較簡單！不過我啲仔𠵱家就鍾意Jordan波鞋同Adidas；又會叫我買figure，原來好貴㗎，成3千幾蚊一個！
陸詩韻 Bold袋好矜貴學生時代最鍾意Bold袋！嗰時嘅Bold袋係水桶形，側邊有鐵箍箍住，中間最矜貴就係有個鐵牌！嗰個牌要寄返去外國刻你個名上去，個感覺係好尊貴！嗰時扭爸爸買扭咗好耐，好似賣1千6百幾，爸爸都好肉赤！
楊思琦 LeSportsac夠潮鞋方面有Dr.Martin啦！袋方面呢，女仔最鍾意孭住LeSportsac，有好多pattern、好鮮艷、構圖又好豐富！呢兩樣係同學仔必備，但我話你聽，呢兩樣嘢我都冇㗎！
蝦頭 必養他媽哥池學生時代嘅潮牌一定係他媽哥池！嗰啲York、Bold袋、Dr.Martin我都有，但嗰啲都唔重要，當我見到有一個同學買咗隻他媽哥池，我就即刻走去買，然後全班個個同學都袋一隻！我最鍾意養大佢之後唔清潔啲屎整死佢，跟住再養過一隻！
街坊：Jordan一定要有明星愛買袋，反而時下一班後生仔最注重對鞋，冇對Jordan傍身，點見人先？
佟先生
iPhone、Jordan一定要有啦，尤其係Jordan 1！袋就Herschel啦，我喺銅鑼灣買，同學仔必備！
趙先生
LV、Gucci啦！啲同學最鍾意斜孭袋同心口袋，我自己就用agnès b.；鞋就著AJ，文具當然係用無印啦！
鄭小姐
身邊好多人用Mastermind銀包，皮帶就用Y3，不過自己冇買。
