陳珍妮無線前新聞主播書展出書爆大鑊：大台徹底摧毀我

無線新聞經常被揶揄事事旦旦，原來在新聞部打工都要埋堆襟撈才有運行，曾經將國家總理李克強口快快講成李克勤的前主播陳珍妮（Jenny），今年書展會推出《TVB新聞部血淚史》，大揭當中辛酸，全書齋文字沒配圖，賣點鮮明爆料，Jenny文中提到後期返工要啪安眠藥，不離職會生癌，受盡委屈的她直播期間也會匿埋偷偷喊，4年主播生涯更摧毀了Jenny的價值觀。撰文：比華利
前主播陳珍妮的新書《TVB新聞部血淚史》爆無線新聞部大鑊，離職3年多的她於自序表示此刻聽到大台新聞片頭預告聲仍會打冷震：「畢竟服安眠藥才能度日的歲月，烙印太深。」書中她揞名爆黑幕，指回憶都痛苦：「再留下，我會生癌的。走吧！」Jenny日前在中環接受本報獨家專訪，講到激動處更眼紅紅。

訪問當日，陳珍妮講到辛酸史，激動起來更眼濕濕。

Jenny指無線主播起薪點低，甚至要在淘寶買出鏡平價套裝。

喊完再笑住出鏡

Jenny在第一篇便自爆得罪陳志雲，她提到某年生日，臨時接通知返公司上堂，壽星女當日淡妝配穿及膝裙，但兩日後被上司照肺，她當日離開坐城巴下層最後靠窗位，被當時陳志雲秘書撞到，指她「擘大對腳走曬光」，負上「唔檢點」罪，Jenny解釋有放大手袋在及膝裙上，沒可能走光。解釋變掩飾，Jenny從此沒運行，陳生有份審閱出鏡費卡士沒份，連帶半年返通宵更。Jenny提到其後向管理層「樹先生」請教如何改進，她說：「樹先生頓了一頓說『檢點啲啦』。」

入世未深的Jenny不知同事間溝通用的Intranet會惹是非，「樹先生」有權限看到全部留言，Jenny試過在直播時，被指髮型不對要即拆髻，她事後才知一直被針對是因為曾在Intranet鬧過老細。Jenny又呻有時委屈到要匿埋喊，轉頭又假笑出鏡：「喊完返去執個樣又再讀囉。」

Jenny曾擔任亞視新聞主播，一年後過檔入無線。資料圖片

TVB新聞小花如陳珍妮（中）和黃紫盈（左）陸續離開轉型。資料圖片
壓力大患情緒病

入職月薪只有$11,000的她要淘寶買平價套裝，上司S卻要她幫襯其私人髮型師，又要有指定髮型，試過明明沒戴錯吊吊揈耳環，卻受罰要寫道歉信。Jenny與負責編更主播C不熟，更表往往最「惡啃」，她在書中控訴：「大台徹底摧毀並改造我的價值觀。」

訪問當天，Jenny直認壓力爆煲失眠：「臨走前半年係咁睇醫生，醫生話太大壓力，更表太亂，成日返通宵，有時返完通宵又返晏，成日瞓唔到，醫生知道我情緒上有問題，開血清素、B雜畀我食。」Jenny瀕臨抑鬱邊緣，回想近4年黑暗生涯，忽然淚盈於睫，問Jenny沒向上司反映不公平嗎？她說：「講過佢唔理，嘥氣啦。我問佢唔係有能者居之，跟住佢答呢度唔係，所以先輪到你。」上司不關心員工？Jenny說：「佢唔關心我囉，唔得寵！我接受咗自己唔係老細最鍾意嗰個，一個人可以坐大，係俾上司縱到咁，一個咁大嘅機構，唔係需要做到嘢嘅人，點解會咁扭曲？」Jenny揞名爆惡頂同事：「呢個人真係喺我身上留低過傷痕。」
from:http://hk.apple.nextmedia.com/entertainment/art/20150715/19219436

陳珍妮指在無綫做主播要「聽話」才有運行。

無綫前主播陳珍妮在書展推出《TVB新聞部血淚史》大爆黑幕，她更列舉了五項不滿。

冤屈一　無故被指不檢點

陳珍妮穿及膝裙搭公司城巴，選坐巴士下層靠窗位置，卻被當時陳志雲秘書撞見，指她「擘大對腳走晒光」，硬被指「不檢點」。其後陳生有份審閱出鏡費卡士統統冇份，陳珍妮最後捱了半年通宵更。

冤屈二　逼用指定髮型師

主播的造型要統一，包括髮型和化妝，不能決定自己的髮型。高層「樹先生」曾在直播期間下令陳珍妮拆髻，上司S則要她幫襯其私人髮型師。

冤屈三　為耳環寫道歉信

陳珍妮指主播出鏡不准佩戴吊吊揈耳環，但她有次出鏡戴了一對購自曼谷約10元珠珠耳環，其實沒違規，但卻也被指犯錯，中段要脫下，事後還要寫道歉信。

冤屈四　編更同事有私心

同事間要埋堆，編更主播C有私心，沒私交的話，更表就必定「惡啃」。

冤屈五　高層有權睇留言

內部溝通用的Intranet最是非，陳珍妮不知高層「樹先生」有權限睇所有留言，事後才知被針對是曾在Intranet鬧過老細。
from:http://hk.apple.nextmedia ... 150715/19219438

陳珍妮話無綫新聞部有啲主播好偽善，借啲易上位。

無綫前主播陳珍妮喺今年書展推出新書《TVB新聞部血淚史》，大爆喺無綫新聞部打工嘅辛酸，佢日前喺中環接受本報嘅訪問，直言話離職之後，嗰晚即刻喺fb unfriend咗一半同事，佢又喺本書度揞名爆管理層樹先生、上司S，甚至眾主播嘅事，唔少人睇完之後，即刻喺度玩猜猜他/她是誰，對於大家嘅回應，陳珍妮前晚喺fb話：「問心無愧，此心可昭日月。」

有「淚之小花」之稱嘅黃紫盈，話揞名爆料唔使當真。資料圖片
人嘅本質有問題

陳珍妮好坦白話最令佢難受嘅係主播W同主播M：「我接受咗自己唔係老闆最鍾意嗰個，但係唔好太過份囉，真係上有好者，下必甚焉。一個人之所以可以坐大，其實都係因為俾上司縱容到咁。所謂喜唔喜歡、得唔得到佢歡心，同佢嘅表現係完全冇關係嘅。」喺佢筆下嘅主播同事，有人周身名牌，有人間中喜愛夜蒲，亦有人鍾意飲兩杯，但係陳珍妮覺得呢啲都唔係問題，問題在於人嘅本質：「我唔會覺得講粗口嘅人係唔好，反而我覺得偽善嘅人仲可怕。主播都只係普通人，佢都有佢哋嘅需要，亦都唔係你想像中咁好或者咁唔好。」

離開咗嘅新聞小花黃紫盈接受訪問，聽到陳珍妮本書內容有揞名爆料，紫盈話：「吓，係呀？係咪寫得爆啲吸引人睇，我唔擔心被爆，同佢都有兩句。是是非非唔需要介懷，得啖笑，唔需要太在意，當茶餘飯後笑話，始終單方面寫嘅，聽吓、睇吓，娛樂就算，唔需要當真。」

撰文：馮仁昭

馮仁昭
from:http://hk.apple.nextmedia ... 150716/19220929

陳珍妮昨晚在書展宣傳她的新書。

無綫前主播陳珍妮昨晚到書展為新書《TVB新聞部血淚史》舉行簽名會，新書推出後未獲舊同事支持，她一臉不屑說：「香港係言論自由嘅社會，我講自己嘅故事。冇諗過送書畀前高層，佢哋未必有興趣，亦冇諗過舊同事會撐我。」她又稱未必多數人認同的事就是對，亦有在職舊同事買書支持自己。對於另一位前主播林昭儀以「丟架」來形容她，陳珍妮說：「同佢唔係好熟，但會尊重佢講嘅嘢。」

而無綫前體育新聞王子伍家謙亦出席書展活動，問他陳珍妮對無綫的指控時不願多談，只說：「我就唔覺得編更不公，因為大家喺呢方面都有共識。」

採訪：譚倩宜
攝影：沈健程
from:http://hk.apple.nextmedia ... 150717/19222041