睇完條題，相信你跟我一樣，懷疑香港邊度有峽谷？無錯，香港係細，幾十層樓高嘅峽谷未必有，但幾層樓高嘅仍大把。若果峽谷河水量足，跳潭炸水、游繩飛索、滑石潛河，挑戰度絕對唔低。我哋一班從未玩過嘅，決定初體驗，但都運用到全部挑戰技巧。當從90懸崖游繩跳落瀑布底時，發覺我這名c9原來都好掂㗎！哈哈哈哈……
Eric sir係歷奇教練，經驗非常豐富，全港7大澗全都玩勻。
「峽谷挑戰」係從澗頂沿河向下遊走。走嘅路線要喺河裡面，跟山行就沒意思。由上而下玩，唔使逆流跟水流鬥力，危險度相對較低。雖然難度減低，但教練Eric sir話：「當中仍有相當嘅挑戰度，會運用很多挑戰技巧。像利用安全繩和安全扣從高處游繩落地、水底閉氣、人體保護法、跳潭等。」
安全又刺激每年夏天都聽有人玩澗出事，Eric sir話正因為咁，所以佢哋特別從美國峽谷挑戰協會請來總教頭做訓練，教出18名考獲證書合資格的香港教練，並於3年前成立香港峽谷挑戰協會，是美國協會的屬會，以安全又刺激的方法玩澗。協會除開辦教練證書課程，每年更舉辦Fun Day，讓市民初體驗。Eric sir話：「通常都係夏天舉辦，因水流量足。都有好多團體、學生和OL嚟玩。（OL都玩？）係啊，女士們都好鍾意挑戰。」
技巧一特殊姿勢。一腳伸直、一腳微曲，增加摩擦面，從斜坡好似滑梯咁順滑到安全位置。伸直的腳可以喺跌入潭時頂住石頭。
技巧二人體保護法。由教練把手掌貼靠石邊，形成人肉梯級，方便體驗者一步步沿石邊行落去。
技巧三水底閉氣。跳入潭中再閉氣穿過前面的巨石底，從石另一邊浮起。
OL係教練Bunny本身是OL，一手gel甲，玩完還拿唇膏補妝，原來玩了峽谷挑戰多年，更是本港唯一合資格的女教練。她直言，峽谷挑戰夠刺激，跟平日生活好唔同。「平時坐喺公司，太正經嘞，嚟呢度可以癲嚇，好正。「家人好放心我玩，反而男友擔心。試過幾個男友都唔鍾意我玩，話覺得我今日出門，唔知幾時會返。其實玩戶外運動難免擦傷撞瘀。無計，只可以話大家唔同type。」
Bunny愛峽谷挑戰，因每次嘅水量、環境和天氣都唔同，非常需要思考判斷和應變能力。而且全身肌肉都用到，人都fit好多。
Bunny貪靚，小腿加厚墊，以防撞瘀，無得穿短裙仔。看她浮潛衣都玩到穿窿，就知佢幾勇。
記者
攝影師從石澗滑下，型爆！
聽落幾好玩，決定一試。地點係馬鞍山馬大山澗，行程專給初體驗者，難度唔算高，卻有齊各項挑戰。出發前，穿裝備。Eric sir話：「裝備全合乎歐盟及國際攀山標準。當中嘅Totem圖騰扣，更是美國教頭特別設計，專給峽谷探險用。」行咗一段山路，來到澗頂。先做拉筋，以防抽筋，但耳邊是轟轟水聲，心有啲驚。
又爬又滾出發。第一項挑戰是在石面滑落石澗。咪以為易，因唔知下面嘅水有幾深、水底石頭係點樣。好彩Eric sir伴住，教以特殊姿勢滑落去。因有股兜增加摩擦力，滑在石面唔太快。跌入水中，水唔深。且河水透心涼，感覺爽啊！沿澗向下行，好多時都企唔穩，要坐住落、爬住行、扶住走。一個唔小心跌低，要連爬帶滾才能站起。此時，看到大隻型男教練，在澗中如履平地；在石面跳來跳去；從潭底慢慢走出水面，迎向前方太陽。好man啊！
攝影師跳潭炸水連環睇，愛刺激嘅佢都話過癮。
體力要高開始一段，水位只達小腿，但因前幾天連場大雨，水流有點急，部分位置更形成小瀑布，激起無數浪花，看不到浪花底係乜。每經過這些位，嘭嘭水流撞埋身，爬上爬下仲要唔被水沖跌，少啲體力都唔得。好彩，教練總先行探路，搵出安全路徑，並指示我哋點行。只要跟足指示，問題唔大。遇到石面青苔厚，佢哋仲用手掌造出人肉梯級，讓你安全著陸。行程一半，技巧要求愈高：跳潭炸水、水底閉氣、滑過橋底、進入斜洞，樣樣做齊。
我從未玩過游繩下降，這是第一次，估唔到c9都做到。
最後的挑戰，是從懸崖游繩滑到崖底教練處（紅圈），真係好高㗎！
下了幾天雨，有啲位水流急。
最後高潮行了兩小時，我開始少講話，因為有點攰。以為快到下游，難度會較小，原來好戲在後頭。突然，我們改行山路，繞過幾個彎，來到懸崖頂。旁邊是條兩、三層樓高的瀑布，轟轟水聲衝擊潭底，激起水氣。瀑布寬約一人身位，對面的崖石伸手可及。問Eric sir是否要跳落去？佢話：「唔使！跳落去，企唔穩，撞到頭。就從崖頂一直滑到澗底，可以拜拜了。我哋游繩下降，好安全嘅。」但我心卜卜跳想放棄，因一直未見崖底。但型男教練卻不斷鼓勵；Bunny又重複示範。好吧！終極一試。慢慢倒行至崖邊，坐下靠屁股向前「un」。跌出去了。卻沒有直向下滑，因圖騰扣把安全繩纏得緊緊，只要慢慢放繩，人就慢慢墜下。終到繩尾，跳入潭，向前游，Eric sir在出口頂住，防我向下跌。沿繩爬上崖，發覺自己都幾得！玩足6小時，覺得峽谷挑戰絕對是體力和意志的鍛鍊，好幾次想放棄，又再堅持。正如游繩下降爬回崖頂，型男教練說：「好多女仔來到這裡都話唔落，但最後個個落曬，仲玩完要再玩。」人就是愛挑戰。
諗住帶香蕉去補充體力，點知行完1/3路程，放喺背囊的香蕉變了形。Eric sir仲唔俾通山掉，話要保護大自然。結果揹到返屋企，老公見到仲以為我今日做過乜，咁激。
膠股兜，方便在石面上滑行。
圖騰扣
助浮衣。幫助浮於水中，不懂游水都唔驚。安全帶。峽谷探險專用。頭盔。能調校鬆緊，貼合頭形。
峽谷挑戰Fun Day主辦：香港峽谷挑戰協會日期：致電查詢，因暑期非常滿時間：9am-5pm年齡：14歲以上比例：1教練+1助教vs 6體驗者費用：$350/位查詢：5400 0210/mailto:eric@zenithlearning.com.hk備註：玩前要簽署風險同意書及健康申報書。視乎參加者的年齡、性別和體力，設計不同路線，有需要可中途退出。自備乾糧。最好帶備厚身防水袋或電子產品防水袋，有需要幾個防水袋套住一齊用，我哋就只用了一個防水袋，結果濕壞咗兩部手機。香港峽谷挑戰協會更提供教練證書課程，分Level 1、Level 2、Level 3、助教級及教練級。想做教練更要考獲急救、rescue、懸繩等資格。
撰文：馮淑玲 攝影：李梓軒 錄影：周義安
