世界盃10日後開鑼，不少賽事在本港時間凌晨或清晨開始，令一眾球迷要捱更抵夜一個月睇波。精神科醫生表示，看足64場賽事，隨時因長時間睡眠不足，減低腦部運作效率，變得「冇記性」兼情緒暴躁。即使放工後先小睡兩、三小時，到凌晨才起身睇波，但因睡眠被中斷，不能進入深層睡眠狀態，對提升腦部功能幫助不大。記者：陳沛冰
香港精神科醫學院李永堅醫生表示，腦部內的神經傳導物質，負責聯繫不同區域，令腦部有效運作。每當完成一日工作後，會消耗神經傳導物質，必須有充足睡眠才能補充這些物質。一般人每日須連續睡八小時，但世界盃賽事由32強至8強，每晚有兩至三場賽事，不少球迷「成晚冇得瞓」，擾亂生理時鐘，無法補充神經傳導物質，日間腦部運作變得無效率，更難以集中精神，影響工作表現，「好似踢波冇咗中場指揮官，好難入波」。
最少連睡六小時
部份市民只看自己支持的球隊，會晚上先睡數小時，凌晨起身看球賽，之後再小睡一會才上班，但對提升工作效率幫助不大。李永堅解說，人類需要連續性睡眠，「唔可以好似老鼠，分幾次瞓，瞓嚇又醒嚇」，要保持記憶力，必須連續最少睡六小時，斷斷續續睡眠反會令記憶力下降，「好易記錯嘢，或者片段好零碎」。
他表示，當生理時鐘被擾亂，會影響荷爾蒙分泌，情緒變得暴躁，「容易發脾氣，冇耐性，易鬧人，個人好『謝』，冇動力工作」。本身患有情緒病如抑鬱症或躁狂症的病人，睡眠不足更易病發。每次世界盃期間，喜歡睇波的情緒病患者，求診次數通常會增加。
因夜晚「冇得瞓」，不少球迷都想盡辦法，日間爭取時間小睡。但他指出，小睡時間短，加上日間人體沒釋出褪黑激素，令人只處於淺層睡眠狀態，未必進入可補充腦部神經傳導物質的深層睡眠，「小睡只可補到（睡眠）個量，補唔到個質」，對提升記憶力或腦部功能幫助不大。
即使球迷晚飯後早些睡覺，凌晨再起身看球賽，但飯後腦部仍要控制身體的消化工作，只能停留在淺層睡眠。
上班族睇波要量力而為，他建議，若日間要應付繁忙工作的球迷，需嚴選一些喜歡的賽事觀看，避免連續數晚也「無覺好瞓」，睇波之餘也要兼顧健康。
世界盃期間皮膚護理貼士
1不要只顧睇波而「求其」護理皮膚，要徹底清潔面部，塗上合適護膚品
2女士們要注意每日徹底卸裝步驟
3多吃生果代替煎炸食物
4少吃零食以免防腐劑或味精誘發濕疹
5爭取時間小睡及休息，若服藥及塗藥膏後暗瘡沒改善，需減少睇波場數
資料來源：皮膚科專科醫生陳厚毅
from:
http://hk.apple.nextmedia ... 140603/18742193
