超過52萬人捧場嘅第三批iBond（4218）噚日上市，市場普遍預期首日可見105元，結果事與願違，全日最高只見過103.30元，以收市價103.15元計，每手僅賺315元。
表現遠遜預期，主要有兩個原因。首先，今次iBond每人最多只獲分兩手，較對上兩次少，貨源嚴重分散，加上唔少人透過證券行100%孖展優惠攞貨，在唔想補倉嘅情況下，個個都爭住沽貨，升幅當然大打折扣。另一方面，聯儲局早前公佈退市路線圖，未來將陸續減少買債規模，加息周期隨時展開，在聯繫滙率下，本港亦有加息壓力，卻意味通脹有望降溫。由於iBond派息與通脹掛鈎，回報下跌，表現自然較差。
值得留意嘅係，由於iBond有政府每年1厘回報包底，最差情況下（通脹低於1%），全期（三年）有3厘回報，所以如果用實錢抽嘅戰友又唔等錢使，呢個位絕對唔應該沽貨，相信過咗呢兩日沽貨潮後，iBond價可以見底回升。
唐牛
from:
http://hk.apple.nextmedia.com/financeestate/art/20130626/18312559
