[中國內地] 香港去廣州方法

見好多人問，我就試吓答大家

（一）羅胡口岸過關，一過關就係深圳火車站，你坐和諧號去廣州，和諧號買飛要排隊約15分鐘，等車好快，通常10﹣15分鐘就有，車程80分鐘，但要記住羅胡都幾多人過關，你要預早出門

建議使用此方法之地點：新界東
預計車費：東鐵去羅胡（22﹣25）＋和諧號（80RMB＝102HKD）＝約125HKD
總時間（目的地）：2個半鐘（天河區）
3至3個半鐘（荔灣，黄埔，海珠，越秀區）

（二）坐高鐵，最好喺福田口岸過關，之後坐20分鐘深圳地鐵龍華線去深圳北，深圳北坐高鐵買飛預20分鐘，跟住30分鐘咗右到廣州南，但要注意廣州南離市區有一段距離，如果你想去天河區，仲要坐多50分鐘地鐵

建議使用此方法之地點：新界西，東（市區可以坐巴士去深圳北，但費時失事，唔建議）
預計車費：
新界東出發：東鐵去落馬洲（22﹣25）＋深圳地鐵（4RMB＝5HKD）＋高鐵（75RMB＝95HKD）＋廣州地鐵至市區（7RMB＝9HKD）＝約135HKD
新界西出發：B1巴士去落馬洲支線管制站（12）＋深圳地鐵（4RMB＝5HKD）＋高鐵（75RMB＝95HKD）＋廣州地鐵至市區（7RMB＝9HKD）＝約125HKD

總時間（目的地）：2個鐘（廣州南）
2個半鐘（天河區）
3至3個半鐘（荔灣，黄埔，海珠，越秀區）

（三）坐大巴，當然唔係直接由香港坐到廣州，佢係由市區坐巴士去深圳灣／皇崗口岸，再喺中國轉另一部旅遊巴，呢個方法對於帶好多嘢嘅人幾適合，因為轉車次數少，佢會喺廣州幾個區有站，一般包含咗好多出名大酒店，另外可以喺香港用港幣買，對成日來往嘅人都算經濟，車程如果係九龍／港島出發去口岸要1個鐘，過關時間你預半個鐘，因為要等同車中國旅客過關，口岸關車到廣州大約兩個鐘啦

建議使用此方法之地點：九龍，港島
預計車費：
去唔同旅行車／跨境巴士公司都有，一程約90﹣110港幣，來回套票有優惠，可能來回先180，除翻一程90，已經包埋香港巴士同國內巴士兩程費用

總時間（目的地）：3個半鐘（天河區）
3個半至4個鐘（荔灣，黄埔，海珠，越秀區）