呢頭送走蜘蛛俠、轉頭又有另一位漫畫英雄蝙蝠俠殺到，仲有《冰河世紀4》、《荒失失奇兵3》輪流上畫！唔只戲院熱鬧，會展仲有一年一度香港動漫電玩節2012，今年仲有中日台cosplayer助陣，成班宅男肯定睇到噴晒血！
男仔有着落，點可以對女fans唔公平，去埋全港各地商場嘅hit爆卡通人物展覽，同鬆弛熊、Angry Birds影合照。全港宅男腐女動漫上腦！
巨大輕鬆小熊超超超超鬆弛
今次呢個鬆弛熊場景佔地都算闊，主打中間隻巨型鬆弛熊，大到夠5至6個人企喺前面擺甫士影相。
一下子入動漫節實迫到傻，作為warm up，推介女孩子同小朋友先去鬆弛熊Rilakkuma Cafe逛一逛。走入尖沙咀一線商場The ONE，鬆弛熊變身超巨型立體figure，場中間主打隻巨型鬆弛熊擺埋佢個臥佛招牌動作，cute到不尖叫不是人。兩邊仲有鬆弛熊cafe同部屋場景，影相位極之多。仲有齊小白熊（Korilakkuma）同小黃雞（Kiiroitori）喺到歎咖啡、食朱古力，hea到暈。無論係腐女定港女見到，都好想坐埋喺度，一齊鬆弛合照！
Kay：我扮過鬆弛熊！
原來謝安琪同佢囝囝都好like熊仔，Kay媽話自己最喜歡場內咖啡店場景：「我哋一家三口都鍾意熊仔夠hea，仲曾經幻想過自己開間鬆弛熊咖啡店。」佢仲爆料話，曾經喺阿仔生日會扮鬆弛熊：「件衫問朋友借，本來呢啲工作就交畀張繼聰做，但佢着唔落，咪我出馬囉！」
必影超巨型朱古力
除咗中間隻鬆弛熊變巨型，場內的chocolate同coffee都齊齊中咗多拉Ａ夢放大電筒光線，粒粒都超巨型，夠晒貼題！
伴住喺中間隻臥佛熊旁邊，有呢杯成1米高嘅咖啡，學識整杯面呢個熊頭cappuccino art，參加國際比賽都贏硬。
大杯後面有巨型玻璃瓶裝住熊仔餅，好想偷一塊走呀！
Model坐住嗰粒朱古力，都有鬆弛熊個名Rilakkuma熨字，扮高貴朱古力品牌。
The ONE×Rilakkuma輕鬆小熊品味の家
日期：即日至9月2日（星期日）
時間：中午12時至晚上10時
地點：The ONE UG2中庭
收費：免費
查詢：3106 3640（The ONE）
熊抱要擇日
商場喺日本重金禮聘呢隻識行識走嘅鬆弛熊嚟香港，為配合主題，佢仲係着住特別版圍裙look，日本都未出現過。但留意熊仔出沒有限期，記得擇日去熊抱！
熊仔見面會
日期：7月28日，8月4日、11日及18日
場次：下午3時及4時2場，名額先到先得。
鬆弛熊茶館攬埋熊入屋
跟住去埋鬆弛熊cafe同部屋，雖然熊茶館只係裝飾，冇Jumbo咁索嘅女侍應、亦冇咖啡賣，但三隻主角歎住咖啡擺chok樣，粉絲可以走入鋪頭任攬唔嬲！而另一邊就用部屋設計，3位主角喺梳化排排坐，難得仲預留位置畀粉絲坐低影合照，輕輕鬆鬆攬熊影相！
日本人好鍾意飲咖啡，難怪連來自日本嘅鬆弛熊都飲埋一份。
鬆弛熊部屋設計絕對唔馬虎，有齊茶几、梳化同咕，隻鬆散熊仲攬住杯咖啡喺度笑，感覺好warm！
原本臥佛熊旁邊的巨型咖啡，去到部屋變番細細杯，襯番個場景。
咪走漏眼呢間cafe個布景場，設計其實好有歐陸風味㗎！
有得睇有得食
場內餅店Harlan有夾crossover，喺商場買滿$300，就可用$19入手呢件鬆弛熊朱古力蛋糕（手心咁大），每日限量100件，粉絲必搶！
索模Jumbo讚勁cute
影足兩三個鐘，攝影師一行開睇位，兩個model都各自拎相機同呢班熊合照。
我都有好多朋友鍾意呢隻熊，今次變到咁大隻，真係勁得意，我本身係蠟筆小新粉絲都俾佢吸引到！
動漫節Cosplay起義
我攬索柏唔攬你！
去完女生最愛熊仔Cafe，快坐小輪過海去灣仔會展，因為一年一度動漫盛事「香港動漫電玩節2012」又到，又要入去迫人、買新貨、影囡囡。雖然今年動漫節冇知名漫畫家到場，不過又唔完全係壞事，冇星到反而多咗空間畀本地動漫玩家，除咗一系列cosplay比賽，仲搵到中國、台灣、日本嘅超班cosplayer到場交流，記得帶定長炮+單反影相。
頂班華人Cosplayer到場
Cosplay大賽總決賽：7月31日下午12:30至2時/頒獎禮：同日下午5時30分至6時
台灣代表Hiko
台灣代表紅月司
中國代表美萌社團
14th香港動漫電玩節2012
日期：2012年7月27至31號
時間：每日上午10時至晚上9時（7月31日晚上8時閉館）
地點：香港灣仔會議展覽中心1號展廳
門票：$30（家長憑票可帶同1位11歲以下小童進場）
售票：於7-11及OK便利店指定分店發售，亦可即場購買。
網頁：
http://www.ani-com.hk
奴COMMENT
鬆弛熊hit咗咁耐，終於有商場展覽，仲要跳出平面變3D，好難唔俾女fans攬爆啦！
而我哋班男人，雖然支持蝙蝠俠電影唔拍3D，但都想入動漫節睇Hot Toys批新figure同埋立體電影場景，如果有fans cosplay成貓女入去就仲正，實請佢同我合照。
乜話？今年動漫節冇乜限定版賣？其實買咗咁多年，休息一吓都唔係壞事，唔使因為限定而買，睇啱先買，唔係消費得更醒目嗎？
Hot Toys會展變葛咸城！（動漫節攤位：B1）
《蝙蝠俠：夜神起義》簡直係classic之作，一百犯人Vs一百警察嘅葛咸城混戰真係壯觀！本地薑Hot Toys會將葛咸城呢份震撼感搬嚟會展，攤位整到好似美式舊戲院一樣，夠晒荷里活feel。展品除咗有一系列電影figure，仲有《夜神起義》、《Avengers》非賣場景display畀你任睇任影。
新Batman、奸角Bane、迷彩Batmoblie雖然有得睇冇得買，但Hot Toys話27/7開幕日將有新作公開，仲可以訂埋。
仲有《復仇者聯盟》中嘅超人大戰外星兵場景，極有可能展出埋未公開嘅Hulk同Ironman Mk7。
紀念Chris Nolan三部曲完美落幕，3集電影共9個人物會變成Q版Cosbaby figure（7cm高）發售。（$68抽1隻）
Relax啲，買套《反斗奇兵3》Q版公仔（7cm高）畀女仔。（$420/套）
攤位布置成美式劇院，仲有好多Hot Angels派傳單，唔使怕成張SD card都係影figure相，真人都有！
BANDAI iPhone×幪面超人AR扭蛋（動漫節攤位：A03）
日本廠近排迷上虛疑真實AR code（擴增實景：Augmented Reality），《One Piece AR》限定咭全城搶，但記者始終覺得使大錢買張咭，好似冇買玩具咁有滿足感。7月30日，BANDAI總代理瑞華行攤位可以全球率先扭最新Hybrid Grade AR幪面超人扭蛋！佢連我呢類麻煩友都照顧埋，單隻玩係雕刻精美嘅扭蛋公仔，有手機又多種觀賞方法；只要用iPhone app對住隻figure，屏幕上就會見到超人嘅出招聲光動畫效果。場內仲有$1扭蛋區，平時賣成十幾廿蚊嘅款式都$1任扭，小心大餅「銀」爛褲袋！
新系列「HBG幪面超人AR」，95mm身高比一般扭蛋要高，所以雕刻、上色都好精細。而佢個地台仲印有角色台詞，只要用手機對住佢，就會播放聲畫效果。好似超人Foruze就係變身時嘅金句：「去到宇宙啦！」$40/抽1隻
仲有（左起）香港最新放映嘅幪面超人W、新電影奸角超銀河王、紅黃綠雞仔頭超人OOO。
冇限定執平貨
今年動漫節為咗防止人龍有爭執，禁止攤位以排隊方式賣限定品。好在BANDAI仲有個特價場，呢3件平嘢，幾乎有成6折優惠！
Cherudim Gundam 1/100 HG$195（原價$299.9）
S.H.F超級真劍紅$205（原價$329.9）
Figuarts Zero緋村劍心$205（原價$329.9）
同草泥馬合照（動漫節攤位：D36）
玉皇朝漫畫攤位有《北極熊CAFE》同《草泥馬aru PACA friends》精品賣，熊仔仲有特設6呎高紙板模型，可以埋去扮熊貓影合照！
《北極熊CAFE》韓國製立體貼紙。每張$10/1套4張$35
仲有《aru PACA friends》草泥馬公仔八達通套。未定價
Cyber Clean攤位美女派膠（動漫節攤位：A14）
瑞華行攤位promo緊呢款Cyber Clean gadget清潔膠，將啲鬼口水貼落手機面，輕輕捽幾捽就乜塵都黐走。現場仲有美女示範，影張相post上fb，caption寫咗Cyber Clean個名，一有人like即「派膠」送試用裝你用。
會場優惠
140g杯裝2件$80（原價$100）
140g杯裝+75g包裝$65（原價$80）
140g杯裝+75gHello Kitty版包裝$70（原價$85）
500g桶裝=$95（原價$130）
Gameone比武招親（動漫節攤位：D01）
今年，Gameone攤位將會以「真武俠」為展覽主題，找來中港台三地索模搞選舉，最有話題性就係喺YouTube拋晒胸拍片教過80萬宅男炸雞排嘅鄭佳甄。好玩在fans想投心水女神一票，要先用手機下載「微信App」，再對住model身上嘅QR code嘟佢一嘟，至於個code收喺囡囡身上邊一忽，真係去到至知。投選嘅女仔成為冠軍，有機會獲得Samsung Galaxy SIII手機！
開幕禮中仲會公布跟香港高登合作，推出包羅小說、漫畫、動畫、電影嘅網頁遊戲網站「GoGoGame」。
重點作包括《九陰真經Online》、自行研發作《火鳳燎原Online》、《第八銅人Online》。
雞排妹鄭佳甄
雞排妹靠一套教人炸大雞排嘅YouTube片成功上位，雖然少少偷高登炸雞條橋，勝在索囉！
猴抓妹陳維芊
年頭去印尼行動物園，笑住俾馬騮除bra晒I cup嘅台灣政大猴抓妹Charmian，同步殺到！
Metalware SIII case韓日混戰動（漫節攤位：E15,19）
Gundam殼以白色為主，最襯白色SIII！各$198
場內率先賣3大系列嘅日本動畫Galaxy SIII殼，雖然明知電鍍金色殼係指紋取樣器，但佢用咗黃金聖衣星座形態做圖案，仲有Swaroski水晶做點綴，真係豪到我忍唔住想要。同場仲有機動戰士高達、幪面超人系列SIII case添！
Swaroski水晶排出星座圖形，由於製程複雜，會場只作展出及預訂，預定於8月底取貨。各$398
將幪面超人心口至腰帶位設計成圖案。最正係有戰鬥員嘍囉case，笑咗！各$198
GAMANIA場外一樣精采
迫完動漫節唔代表今次動漫暑假就咁完結，再介紹其他動漫節場外嘅筍貨同好去處，玩到佢盡！
近排好多朋友都問記者有冇計買韓國男團Big Bang門票，另一樣熱話應該就係韓製3D大作《Cyphers》，呢隻game畀人感覺就係3D對戰版《拳王》，人物設定同出招連技都一樣咁chok咁型，難怪人人都等緊7月31日，由Gamania營運嘅港澳區伺服開放！近排佢facebook專頁仲有潮文比賽，以《Cyphers》為主題寫潮文，最多人like就送你限定稱號同虛寶！
http://www.facebook.com/cyphershk
台灣方面重金請蔡依林為代言人，7月尾喺台灣仲有全球性記者會，唔知G奶會唔會跳鋼管舞呢？
韓系嘅game插畫，冇日系嘅宅男味同台系嘅土味，好似Big Bang咁有型。
其連招又出拳又放槍，可以連百九幾hits，好有《拳王》影子。
RunUp返屋企玩式姬
行咗成日動漫熱點，返到屋企梗係即刻開電腦，玩雲起隻正宗日系製作嘅facebook網遊《式姬草子》啦！遊戲以日本平安時代為背景，玩家係一位法力高強的陰陽師，你要靠不斷進行「召喚式姬」、「式姬合體」、「式姬升天」3個step，製作出最強勁嘅式神女戰士，去消滅妖怪。
http://www.facebook.com/funmily.sk
畫面日本風，跟平常玩嘅《The Sim》同《Simcity》非常唔同，喜歡日系動畫嘅人一定要試！
另一大熱web game《甜蜜契約online》最近改版，開放升呢至80級，仲有全新70級副本戰場「金剛木偶諾比森林」你玩！
To-Fu Oyako
百變豆腐表
來自東京的To-Fu Oyako，呢排出咗隻one size啪啪時計，其表帶一拆即解，畀你隨時換唔同表情嘅豆腐人表面，更可以裝入iPod nano變身MP3手表，而拆出來嘅表芯又可以當做迷你座枱鐘！售價$398
查詢：2682 1068
仲有紫色版本，手汗大唔想戴白表，揀佢啦！
於推廣期內到指定零售商購買To-Fu Oyako時計，送多粒限量版苦面豆腐頭畀你隨意變臉！（數量有限，送完即止）
Pop Art市集又影又玩
鬆弛熊又好，高達又好，日本動畫睇厭啦，轉口味去尖沙咀K11商場，佢哋請咗美國Pop Art藝術家Erick Scarecrow，以Food Art Festival做主題，設計8款1.5米figure做食檔知客，行完動漫節，去到有得影有得食！
K11藝滋味（Food Art Festival）
日期：即日至8月31日（星期五）
時間：上午10時至晚上10時
地點：K11露天廣場、中庭及G/F藝窗
收費：免費
查詢：3110 5895（K11）
戴晒cap帽嘅貓女，負責睇生果檔，唔怪得要著到咁sharp。
Erick深受亞洲文化影響，呢隻兔女戴住越南帽賣蔬果，仲踢住對膠拖，感覺好地道呀！
賣酒嗰位仁兄顧住自隊，成車酒喺後面都唔理，model見到猛嗌好cute！第日嚟到，可以學model咁扮拎走支酒影相，實勁多朋友like。
大師寸過黑武士
大師話自己嘅創作靈感來自80年代的動漫、電子遊戲同模型玩具，曾經同《Star Wars》搞crossover，搞過粉藍色kawaii黑武士頭盔，美國上位中。
一路行一路玩
唔只有figure影相，喺商場買夠指定金額，就可以去玩呢個超長屏幕走廊體感game，扮潛水員落水底探險。
奇幻互動水底美食世界
日期：即日至8月31日（星期五）
時間：中午12時至晚上9時
地點：K11Stage of the Arts（B207）
收費：星期一至五作任何消費或星期六日滿$300
影低chok樣
開始前要對住潛水頭盔影張相，你個chok樣就會key上潛水員頭上面。沿住走廊行，畫面上嘅潛水員就識跟住郁。途中潛水員會俾雪糕同pancake卡住，要跟指示做動作先走得甩。
起勢fing
即使係落入機關，其實要走甩都好簡單。跟住畫面動作起勢fing，即時搞掂，小朋友玩都實過關。
Angry Birds怒扔紅雀上太空
繼續睇made in USA卡通人物，將軍澳同馬鞍山區嘅商場搞緊憤怒鳥主題展覽，話晒原作係遊戲，超巨型Angry Birds肥雀肥豬唔只有得影，仲可以掟！最抵死係以最新Angry Birds Space為主題嘅新都城中心，綠豬笠晒太空氧氣罩，真係cute到好想掟腫佢！
將軍澳新都城中心用Angry Birds Space做主題，巨型紅雀改戴黑超，個look勁有型！
大大隻綠豬笠住個氧氣罩，雖然好靚，但影相就好易反晒光。
現場仲有實體版Angry Birds，買夠$300蚊就有得玩，勝在扔完一輪唔使自己執番。
馬鞍山個場用番原版做主題，紅、黑、黃三隻雀企定定任你影。
MCP新都城中心×Angry Birds Space太空漫遊之旅
日期：即日至8月12日（星期日）
時間：中午12時至晚上10時
地點：將軍澳MCP新都城中心3期L1
收費：免費
查詢：3194 3200（新都城中心）
新港城中心×Angry Birds SUMMER PIGNIC夏日激「彈」之旅
日期及時間：同上
地點：馬鞍山新港城中心L2天幕廣場
收費：免費
查詢：2643 9110（新港城中心）
睇肥豬上堂
講咁耐，終於有本港卡通代表出場。成間春田花花幼稚園搬晒入青衣城。睇實麥嘜、麥兜上堂之餘，仲可以同阿輝、得巴上音樂堂，我真係好想The Pancakes會突然出現教我唱校歌囉！
Sing Sing響全城
日期：即日至9月2日（星期日）
時間：中午12時至晚上10時
地點：青衣城一樓夢幻大堂
收費：免費
查詢：2186 7284（青衣城）
荃灣有個迪士尼
即使粉絲買咗迪士尼全年票，夏日炎炎入去探米奇都真係幾辛苦。最近荃灣廣場搞咗個米奇度假村，有齊1:1米奇、米妮、唐老鴨同布魯圖企喺冷氣商場度，舒舒服服任你影！
荃灣廣場「米奇與好友拍出開心暑假」
日期：即日至8月19日（星期日）
時間：中午12時至晚上10時
地點：荃灣廣場一樓展覽長廊
收費：免費
查詢：2498 8343（荃灣廣場）
