電車站裝QR code免走雞 搭客手機查3班車到站時間

Emily去港島行街，都鍾意搭電車，但試過等車等到唔耐煩。不過，今日開始，電車公司會喺全港島120個車站裝上QR code，市民用智能手機解碼，可以實時查閱佢哋所在車站嚟緊3班車幾時會到，仲有埋架電車嘅目的地。以後如果等等吓車，突然醒起八達通未增值，又或者想行開去報紙檔買份《明報》睇吓，都可以先睇吓班車仲有幾耐至到，唔使擔心會走咗班車。

擬20站裝LED顯示屏

電車公司董事總經理Burno夏睿德話，舊年嘅客量受加價影響下跌3.4%，今年首季亦比去年同期跌2%，加上西港島線分別會喺未來幾年通車，公司希望提供多啲呢類資訊畀乘客，務求客量今年可以止跌。

佢哋仲會計劃今季開始喺車站安裝LED顯示屏，無智能手機嘅市民都可以睇到實時資訊，初步考慮喺約20個車站安裝，會先考慮較繁忙的車站，例如中環畢打街。