日日都睇iPhone 4 o既消息，夠皮未？都係時候轉o下話題喇o卦！今日先之達人行先達果陣，特登問o下班大佬呢排除左iPhone 4，仲有咩機多人問？答案原來係三叔部Galaxy S！部機仲逆市升價添！
聽班大佬一提，我就記番起上兩個禮拜見到D Galaxy S 水貨係賣緊$3,880，但今日反而係賣$4,180！咁奇，我忍唔住再問問班大佬，部機做咩會貴左架？佢o地話可能同口啤好有關，呢排突然多左班客走黎搵水貨Galaxy S，而且由於水、行機價錢爭左$1,000 有多，班客都係主力去買水貨。佢o地仲話連自己都估唔到突然咁好賣，補貨都補唔切呀，所以咪賣番貴D 囉，過多個星期有大貨番先可能平番D。
之後我上網睇番，又真係見好多人話想買Galaxy S。D 手機論壇差唔多日日都有人問「買Samsung i9000 有咩要注意？」「諗住出Galaxy S，麻煩大家俾D 意見」「Desire 定i9000 好？考慮月尾出機」關於買Galaxy S o既問題真係多到登唔晒，真係好多人對佢有興趣咁喎。
其實又唔出奇o既，話晒部機傳緊就快有得Update Android 2.2，之後就睇到Flash，可以直接睇到TXB 個mytv 喎，iPhone 4 始終做唔到。同埋有D 人仲係怕左iPhone 4 單「天線門」，結果轉左去買Galaxy S。
Galaxy S 行貨定價係$5,580，先達價依然企硬$5,280，冇乜人買。
from:
http://www.android-hk.com/news/sindak-galaxys/
