大鱷狙擊歐元區嘅動作雖與98亞洲金融風暴時有相似之處，評估情況之演變，又跟08年金融海嘯前一刻有幾分相似，禍根又係有人「無咁大個頭戴咁大頂帽」、過度借貸之過。
這邊廂，內地散戶又再要求中央救市，又傳出阿爺已有新措施刺激經濟，真係好似金融海嘯前嘅情況。內地網易最新引述消息人士話發改委正牽頭起草更嚴厲調控措施，力度及範圍仲要升級。
總理溫家寶終就經濟問題開金口，指出宏調正面臨兩難，「形勢越複雜，越要保持清醒」。溫總清醒在於預早防範資產泡沫風險，未來以包括節能減排及內需等新經濟去刺激增長。
溫總理特別提到的幾個領域，係關乎民生嘅水務、低碳煤、垃圾發電，主題係循環再用。上周五大跌市下，相關股份已有異動，連慣性創新低嘅H指新貴龍源電力（916）都造好。
光國增長空間大
溫爺爺咁講，新能源股應再有運行。08年全國環保產業只佔GDP 4.7%，喺政策支持下，無論喺稅制、信貸投放等都會非常優惠相關企業。而當環保概念未成主流時已轉型兼實現盈利嘅光大國際（257），經過多宗收購後，業務重點已非常清晰，分別有垃圾發電、污水處理、新能源，還有環保工程及研發等四大範疇，合晒何尺。
光國90%收入來自環保業務，重點是垃圾發電及污水處理，垃圾發電項目5個，另有5個在建中。國家計劃垃圾處理能力每年近2200萬噸，以光國目前只有320萬噸的處理能力，加上今年有多個水務項目落成，仍有頗大增長空間。
由於公司處擴張投資期，業績仍未交到功課，派息偏低，手頭現金超過20億元，集資壓力不大。投資者喺見識過國策扶持下家電及汽車股之表現，環保概念股有機會成新嘅炒作熱點，加上雷士照明（2222）將於周四掛牌，投資者可以光國去年9月3.03元配股價作參考。美國財長蓋特納將於本月24日訪華，人民幣升值將成為下一焦點，請君看招！
胡孟青
如果您喜歡這篇文章，請按「讚」或分享給您的朋友，以示鼓勵。
