青心直說：配合國策打出生天

高盛認真累街坊，金融海嘯前係咁，海嘯後以為風平浪靜都要玩大震倉，內地股指期貨投資者初嘗造淡，獲利賺到盡。大市以裂口補裂口營造島形頂，走勢認真玩嘢，國策主導嘅風險正在於此。

呢個風險係內地獨有嘅遊戲規則，只要靈活應變，往往可從危機中找到機會，在逆境中賺大錢。金隅股份（2009）去年7月上市，招股價6.38元，首日一度炒上10.50元，其後繼續係散戶追捧對象，蟹貨亦一路累積，唔少老散冇耐性沽貨走人。
不過，大戶唔係咁睇，摩通最近以每股7.95元增持212萬股，持股量升至9.1%，其他大行亦出報告唱好，花旗仲睇11.70元。

金隅既係水泥股，亦有發展房產項目，又係收租佬，仲有建材玻璃，頭兩瓣業務受宏調影響最大，理應受最大打擊，究竟乜嘢葫蘆賣乜藥？先睇去年盤大數，全年賺20.35億元（人民幣．下同），升54%。

金隅力谷保障性住房

盈利增長加快，好大程度同公司將業務重點轉往內房業務有關。08年，公司嘅收入分佈順序為水泥（38.7%）、新型建材（31.6%）、房地產（23%）及物業投資管理（7%），去年水泥維持39%，新型建材（24%）則被地產業務（31%）取代；地產項目去年賺11.88億元，毛利率33.3%。集團去年買入10塊地皮，平均地價每平方米3459元，北京有幾塊地更低至千零蚊，總土儲達559萬平方米。

地攞得平，原來公司已將目標放喺中央力谷嘅保障性住房上，去年有關銷量增1.57倍，賣出11.3萬平方米，未來仲會向商品房進發，比例係20:80。總理溫家寶話，今年要增加300幾萬套保障性住房，喺土地供應上亦會加以配合幫居民上車。內房股識時務配合國策，一樣可出生天。