復活節就快到，小妹原本想去曼谷充吓電，點知曼谷七國咁亂，紅衫軍玩埋潑血。小妹最怕見血，即打退堂鼓改去台北。噚日上網預先辦台灣簽證，可以上機前喺機場嘅中華旅行社取證，方便快捷，網上辦嘅簽證仲可以三個月內出境兩次，每次停留30日；相反做落地簽證只可以用一次，停留時間最長14日。
網上簽證加20元
小妹喺網上填寫個人資料，赫然發現簽證費加咗價，網上簽證由港幣55蚊加到75蚊，加幅36%；落地簽證由200新台幣（約50港元）加到300新台幣（約75港元），加幅50%，幅度好驚人！之前冇聽過中華旅行社公佈加價，小妹上網摷吓討論區，原來唔少網民都大鬧中華旅行社偷偷加價，仲加到五成，簡直發錢寒。
小妹咪打電話去中華旅行社問吓（熱線2525 8316）點解加得咁勁，點知駁咗去電腦錄音，話線路繁忙，打極都冇人聽。惟有轉搵台灣觀光協會問問。職員話台灣簽證費過去五年都冇調整過，所以中華旅行社今年加價。
之前港台兩地講到㷫烚烚話可以免簽證，點知一直只聞樓梯響，免簽證不成簽證費反而狂加。旅遊業議會總幹事董耀中都話好無奈，人哋要加都冇法，加上泰國唔爭氣，復活節唔少港人轉去台灣玩。議會稍後都會向中華旅行社反映吓免簽證嘅問題，「好似日本畀咗港人免簽證，家旺上加旺。
如果您喜歡這篇文章，請按「讚」或分享給您的朋友，以示鼓勵。
