荃灣格價　百佳、惠康「貴通街」

家時勢唔好，買嘢都要格清楚價，唔好以為差一個幾毫，真係小數怕長計。好似消委會啲老友前日走去小妹娘家荃灣區啲超巿格價，小妹經常喺嗰區買嘢，當然要實老友格價啦。
佢哋格足40樣食品同日用品，行足廿幾間超巿同藥房，都咪話唔辛苦，好值得小妹借鏡，買嘢前花小小時間格價，一定有錢剩。

有貨貴藥房成倍
老友話，今次格咗21款日用品，大型連鎖超巿最貴，好似百佳有14樣貨品最貴，要封做「貴通街」，惠康排第二，13款日用品最貴，萬寧排第三，9款最貴。藥房賣啲日用品普遍比超巿平，其中喺川龍街嘅健安西藥房，總共11款最平，佢先至稱得上「平通街」。
好似超巿搶錢最犀利係威露士泡沫洗手液300毫升裝，惠康賣$30.3，河背街嘅信仁大藥房賣$14，惠康足足貴咗116.4%，即係$16.3，拎差額去藥房可以買多一支，仲找番$2.3。又例如多芬柔嫩潔膚塊100克裝，百佳同惠康都係賣$8.5，其他藥房賣5蚊，貴咗成70%，你話超巿係咪搶錢。超巿食水咁深，一句講晒，買日用品，一定要幫趁藥房。
食品方面，消委會格咗19樣，其中惠康7樣食品賣得最貴，華潤萬家同百佳分別有5樣同4樣。講到最多平貨嘅，就係佳寶食品，7樣嘢最平。好似淘大珍珠雞3件裝，華潤賣$15.9，佳寶賣$8.9，貴咗成七成。