社民連三子及多名泛民主派議員昨日出席預備會議均支持民間高鐵專家列席今日財委會會議，但保皇派議員表示無法認同，工聯會潘佩璆稱，只讓專家組發言對其他團體不公平，言論惹來黃毓民不滿，大喊「幫手拉布呀潘議員！」
詹培忠對毓民插嘴明顯不滿，在座位上不停嘮叨，指「點解可以亂咁噏嘢」，惹來社民連陳偉業不滿，雙方其後展開對罵並打斷了謝偉俊的發言，詹其後衝向社民連三子的座位，罵道「點呀你哋想點呀？咩呀家你哋三個惡晒呀！」會議主席劉慧卿不停勸阻，「唔好嗌交啦，詹培忠議員請你返埋座位！」
不過，詹培忠無意收兵，黃毓民即揶揄道「再嚟呀，我畀個杯你掟啦。」「潮州怒漢」被挑釁後即向黃反擊，「你以為你黑底就惡晒呀？」毓民立時扯火，起身指向詹培忠着他收回發言，詹卻繼續謾罵，劉慧卿見情況不可收拾即宣佈休會。
二人至此仍無意停火，反而越罵越激，詹培忠指着黃說：「你係（黑底）就認，唔係就可以唔認！」黃回應說：「我梗係唔係」，「你唔係就當着人話你唔係！」「我唔係！」「但係你曾經係！」至此毓民大罵詹為「監躉」，詹則回一句：「係，但你遲早都係！」黃怒指「我驚咩呀？我驚你有牙呀！你仆*，你快啲去仆*！」
黃毓民隨後又指詹培忠為乞兒，詹培忠說：「我乞兒，但冇爭人錢！」「我爭人錢關你差事，吹呀！我爭你老×呀爭錢！」保安人員此時已包圍兩人，但陳偉業加入戰團，「我正式挑戰你，（1月）27號你唔同我一齊辭職你就係縮頭烏龜。」雙方罵戰足足4分鐘，最終劉慧卿一錘定音，「如果再喺度擾亂秩序就要即刻趕走。」此時詹培忠仍想發圍，劉即罵道「你唔好再嘈呀！」
會議尚未完結，二人即走出會場外，於記者面前握手言和並公開道歉，詹培忠指，不希望自己行為教壞年輕一代，「我哋做錯就要承認。」黃毓民亦指成年人「相嗌唔好口」，「唔好喺呢啲公眾場合度（對罵），難睇呀，我自己都覺得後悔。」
時事評論員劉銳紹認為，事件將進一步打擊市民對立法會議員的信心，「好多嘢係有積累性效果，市民對議員嘅評價已經越來越低，對好多市民來講，佢哋唔希望議員只係有暴力行為而冇建設，咁今次一定會喺形象上打個折扣。」家長協進會會長黎曾慶指二人罵戰立壞榜樣，影響深遠，「議員要有操守、自己人格，只能夠『唉』一聲，可悲……佢哋失分，將立法會變國際笑話，呢鋪全港都輸。」
http://hk.apple.nextmedia ... art_id=13605537
