so fuuny....
小妹最近養咗隻迷你史納莎狗，但冇養狗嘅經驗，有時見佢對住我係咁吠，都唔明佢想表達啲乜。如果有部好似動畫電影《沖天救兵》裏面嘅狗狗繙譯機，綁喺條頸，狗話變人話，咁就好囉。點知專售日本潮流產品嘅JC shop老闆Alan打電話嚟，話喺日本引入咗玩具製造商Takara Tomy狗語言繙譯機。
咁正？小妹飛身去佢間舖吓。Alan話，呢部機已經係第二代，第一代02年喺日本開賣好鬼哄動，攞咗搞笑諾貝爾獎。呢部新機比舊款機功能勁好多，分別由內置咪高風繙譯器及無線手提顯示屏組成。繙譯器掛喺狗頸，當狗吠叫，部機會將狗吠聲錄低，就將數據傳送到手提顯示屏。部機可繙譯56種狗種，包括6種混種狗，能譯出1,200句狗話，大約表達狗狗六種心情如興奮、寂寞、失望、慾望等，「仲有埋圖示同真係發聲功能㖭。」
售價逾二千元
Alan仲陰陰嘴笑講，部機可以幫狗仔追女㖭，有個朋友養咗隻金毛尋回犬，早幾日咪帶部機畀金毛仔試戴，跟住拖佢出街。點知金毛仔一見到隻芝娃娃，癲咗咁圍住佢猛咁吠。經繙譯後原來隻衰嘢想追呢隻狗女，猛問佢「去邊度、去邊度」，又話「一齊去玩」。Alan又話，主人想知隻狗滿唔滿意自己，可以放佢出去玩，返嚟睇吓佢有冇同friends投訴狗主點衰。小妹問吓價，部機賣2,380蚊，貴唔貴就見仁見智。
from apple daily news
