[資訊分享] 女版機場客運站現身多倫多空港

24小時開放、可自由出入、兼且有瓦遮頭、管制唔嚴……多倫多皮爾遜機場（Pearson Airport）就因為兼具依啲特質，以致經常都有唔少人會喺機場瞓覺。但近日有一名中年婦女喺機場過夜瞓足一個月，當正機場喺免費酒店。

早幾年湯漢斯主演嘅電影《機場客運站》票房大收，當中描述咗一名外國人「寄居」喺機場入面，衣食住行全部喺機場搞掂，引嚟連串笑話。多倫多機場工作人員透露，依名年約40 歲中女嘅行徑同湯漢斯認真差唔多，佢依一個月嚟日日出現喺機場，早上拖住行李四處蹓躂，然後晚上又喺機場度過夜。因為機場24小時開放兼可以隨意走動進出，面對有人喺機場瞓覺嘅現象，工作人員都可謂司空見慣，所以初時佢哋並無對婦女作出勸諭；直到近日有關方面越睇越覺得唔妥，先至選擇報警處理。

皮爾郡（Peel Region）警方表示，佢哋接報到場勸諭後，該名婦女竟然又好合作咁接受咗警方提供嘅巴士票，自願執拾細軟離開機場，而喺傾談過程中雙方並無發生任何爭端，警方指該名婦女似乎又唔似存在任何精神問題。

而對於今次多倫多機場發生嘅「罕見」事件，當地警方事後更呼籲大家唔好將機場當屋企，並希望機場方面可以積極計畫一下如何防止類似事件發生。