喺蛋撻王工作超過10 年嘅鄧生，由麵包學徒做起，現已成為品質部副經理，日常工作會到店鋪視察同檢查蛋撻同麵包嘅原材料等，「做食品呢行唔好怕辛苦，好似我咁由低做起，只要有表現，會有唔少晉升機會。」
政府上星期公布2 至4 月最新失業率，微升0.1%，係自金融海嘯爆發以來最輕微增幅。雖則係咁講，但失業大軍直迫20 萬關口，始終聽落心寒，為咗幫失業人士搵工，勞工處呢輪搞咗唔少大型招聘會，最新一個就喺6 月5 日舉行，有超過500 份工，大部分經驗不拘，好適合啱啱今年中五畢業生去做，唔使驚一畢業，變雙失青年啦。
勞工處最近經常舉行招聘會，6 月又多500 個職位提供。
今次招聘會發言人陳先生同發錢韓講：「今次參與大型招聘會嘅機構，暫時公布約有10 間，好多都係同飲食業有關嘅公司，包括鴻福堂集團有限公司、恆香棧、蛋撻王人力資源有限公司、大快活有限公司、Pacific Coffee Company Ltd.等，淨係呢幾間公司，已經提供超過100 個職位，當中包括店務員、麵包學徒、收銀員、侍應生及咖啡調配員等，部分更毋須工作經驗，中三學歷已經有資格應徵。」
食肆有良好晉升機會
中低價飲食業逆市擴展最快，所以從來最缺人手，雖然話會辛苦啲，但易入行，只要捱得，都有唔少晉升機會，最啱考完會考嘅年輕人儲吓經驗。好似喺蛋撻王做店務員同麵包學徒，升職機會十分理想，公司董事總經理莊裕坤先生就話：「我哋啱啱喺5 月尾開新鋪，遲啲亦計劃擴充，非常缺人手用，所以會請呢兩個職位約10 個補充人手，麵包學徒同店務員嘅起薪點分別係$5,500 同$5,800 ，包膳食，只需中三程度，冇工作經驗都ok 。我哋一年會有約兩次評估員工能力，亦有內部培訓，只要表現良好，大概2 年就可以由麵包學徒升做師傅，到時人工有$7,000 ；店務員表現好嘅話，有機會喺短時間內升做高級店務員甚至見習主任，人工會有$6,000 及$7,000 。」
好似今年過30 歲嘅鄧先生，加入蛋撻王後，用咗2 年時間就由麵包學徒升做師傅，家仲做埋品質部副經理添，「初入行啱啱20 歲出頭，大熱天時對住個焗爐焗麵包，會流好多汗，都幾攰㗎，但見到一個個蛋撻麵包從冇到有，全部係師傅教出嚟嘅成果，就覺得好有滿足感！有時做嘢唔明俾師傅鬧吓梗有㗎，但佢哋都係想我快啲上手。所以後生仔入行，唔好怕辛苦，肯虛心學習，就會培養到成功感，只要有好表現，公司一定會畀機會同事嘅。」
勞工處招聘會
時間：6 月5 日（星期五）11am-6pm
地點：東涌富東邨富東商場1 樓
查詢電話：2852 4985
