家四圍裁員，想搵工最好揀大集團，全港有50 幾間分店嘅Walker Shop會喺4 月20 號搞招聘會，請店務員、資深店務員同店鋪主任3 個職位，要請超過30 人，其中店務員一職，只要中五學歷，底薪有$5,000 ，另外每月仲有$1,000勤工同最少$1,500 佣金，加埋每月會有$7,500 人工，超時工作又會有津貼，比起其他同類型嘅大集團，一般人工由$6,000 起，雖然Walker Shop 人工差唔多，但勝在毋須工作經驗就做得，最啱剛畢業嘅年輕人做。公司仲有唔少晉升機會，店務員做滿1 年以上，就有機會升做資深店務員，起薪點有$6,000 ，做滿2 年以上，表現良好嘅，仲有機會升做店鋪主任，起薪點有$6,800 ，以上兩個職位都有勤工同佣金。
另外，公司亦有唔少福利，好似生日假期、醫療津貼、港島區交通津貼等，招聘部陳先生提醒應徵者，記得喺當日帶齊身份證明文件、學歷證明、工作證明同埋相片，因為當日會即場進行面試，「應徵者嘅工作經驗唔係最重要，反而係面試時要有禮貌，保持笑容，同埋對答時，講嘢要清晰同流利，咁就得喇。」
Veeko 都請人除咗Walker Shop 之外，服裝連鎖店Veeko 亦聘請售貨員，人工約$7,000 ，學歷要中五以上，有經驗優先，想做parttime 都可以申請店鋪助理職位，時薪$30 ，可以選擇喺港島區、將軍澳同元朗返工，有興趣可以致電2887 0888 查詢。
招聘日日期：4 月20 日（星期一）
時間：下午2 時至4 時30 分
地點：新界上禾輋路1 號沙田政府合署2 樓
查詢電話：2158 5556
