呢幾年，特區每間請咗啲三流公關嘅公司，都好鍾意講「企業責任」。咁呢個概念，其實就係嗰啲以前真心想做啲嘢嘅社運分子，因為成家立室，小朋友要讀國際學校，諗出來cap 水。點cap ？咪就係當公司管理層，唔係淨係要向股東負責，而係要將盤生意分餅仔咁分畀「持份者」，而因你能擺佈啲「持份者」，就成功cap 水。
政客工會抽水埋地雷
咁大家可能會問：「持份者主導管理有乜問題？」問得好！孫柏文今日就學哈佛工商管理嘅教法，用case study 講畀你知後果係點。持份者主導管理嘅結果，就係通用汽車(GM)！曾幾何時，通用汽車係世界數一數二管理得好好嘅公司。佢哋嘅總裁Alfred Sloan ，直情係管理學嘅宗師。不過有油水，就會有人想佔便宜。首先，就有政客、工會想你係又加人工，唔係又加人工。當時管理層計過條數，發覺圍唔到數，所以就唔即時加，不過將個波交畀未來一代解決。即係保證啲工人，退休後公司有豐厚嘅長俸。搞到今日，每個返工嘅工人，要背負起超過一個退休工人。跟住又有政府想印鈔票，但又想控制通脹，通過法例唔畀工資上升。令公司要搶工人，就走位保證提供醫療福利。搞到「偉哥」嘅最大買家，係通用汽車。大家諗住奧巴馬今次會撥亂反正？No ，因為佢又要通用汽車擔起「幫美戒石油」嘅責任。通用汽車GM ？Gutted Mess 。孫柏文http://phatdat.blogspot.com
http://appledaily.atnext. ... art_id=12589069
