3月9日，恒指收11344點，跟住就一支箭咁升，到上星期五收14119點。3個禮拜升25%。花旗國一樣，標普500指數由3月6日嘅低位，一升就升22%。食中呢個浪，今年已可收工等花紅。
升市火箭冇咗一截
相信大家想問嘅問題係：「係咪繼續升先？」咁孫柏文就要反問大家：「個市靠乜升咗3個禮拜先？」如果你話係因當今世上至勁股市分析員，花旗總統奧巴馬喺3月3日話股價合理，可長揸，咁我就要攞塊笑聲拍板出嚟打吓你個頭。其實今次升市，係支有兩段燃料推進器嘅火箭。第一段，就係月初啲花旗國銀行紛紛走出嚟話1、2月嘅業績好掂。係咪真係掂？嗰陣已有人玩踢爆，不過因拋空咗嘅人太多，淡友認為博唔過，搞到個個都買貨平倉。火箭第二段，就係財長蓋特納嘅「將聯儲局印咗嘅鈔票，轉移畀啲銀行，去換毒資產」計劃。不過，啲銀行大佬就喺上個禮拜五話，3月生意難做，推翻1、2月好掂，生意復蘇嘅憧憬。股市冇咗呢個因素推動，大家小心。
拒國有化保烏紗
其實，啲銀行3月初時話1、2月好掂，係因為當時國有化風吹得好行，一話自己掂，政府即時冇藉口國有化，銀行高層先保住烏紗。到鈔票轉移計劃落實之後，就可以講番真話，話自己唔掂，跟住攞錢。咁多消息，全部都係啲銀行嘅大龍鳳。孫柏文http://phatdat.blogspot.com
from
http://appledaily.atnext. ... art_id=12568008
