東九龍電腦節就快開鑼，作為AV 界一分子，梗係要預先收吓風。今次係4月2至13日喺九龍灣megaBOX 舉行。電腦節每次都好墟冚，今次破天荒喺商場搞，聽講商場方面都做足準備，除咗預備多啲接駁巴士，仲叫埋電梯公司職員全日standby ，睇住啲使用量突然大增嘅客。
名額120位
梗係第一時間問吓搞手之一、電腦商會會長Jacky 有乜着數先。佢話除咗好多平嘢賣，今次特別搞咗個紅酒美食IT 拍賣會，4月7日喺megaBOX 御苑皇宴舉行，入場要畀$120。吓！要畀錢㗎！Jacky 話：「梗係超值啦！」當晚會有晚宴，每位原價$280，有魚有肉有翅又有紅酒，台上會有法國紅酒、LCD 大電視、Hi Fi 拍賣，仲有歌星助興㖭：「同你咁熟先講，到時台上拍賣嘅仲有靚女，唔好諗錯隔籬，唔係拍賣個靚女，只不過佢哋會負責幫手拍賣啫。」名額得120位，有興趣人士可以致電：81231111查詢。至於電腦節就免費入場，每日都會有限量勁減貨品，包括$7,999減至$4,999嘅42吋全高清LCD 大電視、$2,699減到$1,999嘅Netbook 、$10嘅MP3機、$1嘅speaker 等。
電腦節Netbook 等產品以海嘯價發售。
