話就話正值金融海嘯，但近期不停有廠推出名貴手機，最新一部就係行貨正式登陸香港嘅Dior phone 。
被福布斯選為上年「全球十大最豪華手機」之一嘅Dior phone ，相信大家都想像到佢會極盡奢華。雖然香港賣嘅版本只係冇鑲鑽石同水晶嘅「普通版」，但索價一樣高達$45,000 ，咁又難怪，唔賣呢個銀碼，又的確好難凸顯出佢嘅派頭。呢個價位對你嚟講可能係遙不可及，部機嘅真身亦唔輕易畀你喺Dior 門市觸摸得到，就等《Ketchup 》帶大家接近一下呢份觸不到的豪華。免費文章
Spec.
制式：GSM 四頻
屏幕：2.1"26 萬色AMOLED
鏡頭：200 萬像素
記憶：microSD
體積：99 ×43 ×14mm
重量：125g
售價：$45,000
查詢：Christian Dior （2524 8277 ）
機身里面仍以金屬作設計主調，圓形按鈕中間有Dior 產品常見嘅星形圖案，寓意幸運。
機身除咗刻有Dior 字樣，母機同子機嘅骱位上仲有「CD 」，即係Christian Dior 。
九宮格介面嘅icon 全部係Dior 產品嘅圖案，好似手袋就代表計數機等小工具；而Dior 亦將fashion show 用過嘅音樂mixing 成鈴聲。
價值源自造工
一部價值$45,000 嘅Dior phone ，當然唔只sell 名氣，機身構造都相當講究。部機係由設計過Levi's 手機嘅法國廠商Modelabs 負責開發，主要零件更由法國Sony 工作室嘅人員人手裝嵌，好似生產名表一樣咁認真。而機殼物料選用了316 L 不
鋼，再刻上經典嘅cannage 菱格圖案，Dior 手袋嘅氣派零遺漏咁移植到手機之上。
Dior 公關人員話已售出10 多部Dior phone ，現時全港只剩下粉紅及紅色各一部。
子機嘅背面係一個鏡面屏幕，能夠顯示出來電號碼。
精髓盡在子機
用得Dior phone ，相信都係重外表不重功能嘅用家，所以部機有齊藍牙、200 萬像素鏡頭、支援2GB microSD 等基本功能已經足夠，反而佢附設咗子機My Dior ，就係其他手機冇嘅細心設計。子機其實係藍牙裝置，平時可以掛喺手袋上，插住handsfree 就講到電話，若唔想俾handsfree 線纏繞，仲可以直接拎起子機嚟通話，唔打電話嘅話部母機全日都唔使拎出手袋，唔會狂摷電話冇晒儀態。
最重要嘅配件，刻有Christian Dior 名字嘅手袋扣，接位內藏磁鐵，一靠近子機插孔就會吸入去。
母機皮套仲會襯番手機顏色，例如粉紅同粉藍色機就送白色套，紅色機就送黑色套。
隨機附送一條有線藍牙handsfree 耳筒，上面一樣刻有「CD 」字樣。
細緻見於配件
Fashion 手機著重包裝，除咗手機本身要造得精緻，更比普通手機著重配件，Dior phone 嘅配件相當齊全，即刻晒冷畀大家睇。
筆者去過中環Dior 門市都冇見到有真機display ，想見真身？難！
唔買冇得掂
讀者睇完相可能仲未夠喉，可惜就冇乜機會親手接觸Dior phone 。因為現貨只喺中環置地廣場間Dior 門市有售，但都冇將真機display 出嚟，所以就算你話要買，好有可能店員都只係畀部dummy 你試玩，直至你畀咗錢，先會有真機拎上手！
其他名牌機點賣法？
Vertu 叫人招呼你銅鑼灣Nokia 至尊店有Vertu 嘅專屬售賣區，入面有部分真機擺喺dislpay 箱中展示，但冇sales 駐場，想買機就要叫其他職員搵專人serve 你，即係唔買都冇得掂機。
最貴手機
白金Vertu Signature S Design $280,000
PRADA 電器鋪任玩
LG 出嘅兩代PRADA 手機，都有擺喺普通電器鋪賣，一般客人要求試玩真機，sales 通常都唔會拒絕。
最貴手機
LG PRADA II $6,200
女性意見Model Phoebe
「部機嘅圖案同Dior 手袋襯晒真係好靚，但$45,000 就太貴喇！我成日換手機，買咗佢又唔捨得咁快換，所以冇乜興趣。」
