葵芳青年就業起點喺2 月26 日有約550 份工等住年輕人應徵，見工仲pay 埋車資，勁體貼！日日見報都話呢間裁100 、嗰間炒50 ，打工仔一時三刻點搵到另一份工呢？好彩呢排有大量招聘會，起碼救到燃眉之急，嚟緊喺26 日（星期四），葵芳青年就業起點就舉辦大型招聘會，有約550 份工等住你見，而15 至29 歲去見工嘅朋友，有即場面試外，無論見唔見得成工都有機會嗱番$15 車費津貼，金額唔算多，但一程由荃灣至中環嘅港鐵車資已經cover 到，好體貼到山長水遠嚟見工、經濟環境欠佳嘅年輕人。
今次參與招聘嘅公司，包括Hang Ten 、現代美容中心、順豐速運、美麗寶鞋業有限公司以及安柏市場策劃（香港）有限公司，總共提供約550 個職位空缺。好似美麗寶鞋業就請見習、全職及資深售貨員等超過150 人，以全職售貨員為例，中五程度就有資格見工，有1 年相關經驗優先考慮，月薪已經有$8,100 ，另有勤工獎及OT 津貼，做滿超過1 年兼表現出色，仲有機會升做店鋪主任，到時人工會超過1 萬蚊添。另外，順豐速運會請倉務員及跟貨員等超過60 人，應徵倉務員只需要中三程度，底薪約有$8,800 ，不過就要搬得抬得，生得大隻而有耐性嘅男士就有較大機會見得成工。當中有嘅公司除咗全職外，亦會請時薪兼職，好似安柏市場策劃除咗請推廣員，仲會請時薪$30 至$35 嘅兼職派傳單員。以上部分職位，要求唔算高，人工已經超過$8,000 ，對後生仔嚟講真係一個好開始。
發言人黃國基先生表示，提供車費津貼係想鼓勵一嘅居住離招聘中心較遠嘅人士，「好多後生仔，見一分工都要畀十幾蚊車費，小數怕長計，獲得資助可以幫補吓！」
交通津貼共200 名額今次招聘會可以畀年齡介乎15 至29 歲嘅見工人士即場面試外，信義會仲會為呢個年齡介別嘅年輕人，提供$15 交通津貼，名額共200 個。應徵者只需喺26 日之前，喺辦公時間致電3188 8070 登記，先到先得。不過，住喺「勞工處交通費支援計劃」嘅4 個受惠區域（屯門、元朗、離島、粉嶺和上水等北區）嘅人士就冇得申請，因為呢4 區嘅青年朋友本身可向政府申請車費津貼，今次招聘會只會優惠其他區域嘅應徵者。成功登記嘅年輕人，喺招聘會當日見完工後，唔理見唔見得成，只要嗱住址證明去接待處就可以嗱到呢$15 交通津貼喇。
招聘會發言人黃國基先生表示：「雖然資助金額唔算多，但我哋希望透過呢啲車資，當係對一班年輕人嘅小小關心同鼓勵。」30 歲或以上人士，有興趣都可以嚟碰吓運氣，因為招聘嘅職位本身冇年齡限制，不過就冇得申請車費津貼，亦冇得即場見工，但可以透過招聘會職員，將招聘表格交畀有關僱主。家陣時勢唔好，資助雖小，但誠意真係唔小，希望鼓勵多嘅年輕朋友畀心機搵工啦！
青年就業起點招聘日時間：2 月26 日（星期四）2pm-5pm
地點：葵芳新都會廣場2 期9 樓907-912 室青年就業起點
報名及查詢電話：3188 8070
