中國聯通入面話啲iPhone 3G 係進口貨，咁咪即係水貨囉，叫個特別名部機會型啲嗎？
早排電機兒長期糧尾，到過咗新正頭拆完利是，先有錢追入番iPhone 3G 。
但係先達批水貨機自軟解成功後，由低位$4,100 （8GB ）炒番上$4,780 ，咁鬼貴，我梗係出去格吓價，搵吓有冇地方平啲，居然見到堂堂上市公司中國聯通（上市編號762 ）都賣iPhone 3G 水貨。嘩！聽個名梗係覺得幫佢買機穩陣過先達啦，所以佢哋啲機都賣得貴過先達，但實情批機質素如何，幫唔幫襯得過，都係等我查清楚先決定啦！
賣軟解水貨
美版iPhone 3G 有SIM lock ，唔同其他水機一嚟香港就用得，雖然話解鎖唔犯法，但始終係黑客創出嚟嘅鬼招，究竟中國聯通係咪賣呢種解鎖機呢？我問佢哋sales 時，初初都答得好鬼隱晦，只話部機冇鎖，但俾我chock 多兩chock ，最終都認批機係經過軟解嘅，保養就有一年。
有啲中國聯通門市寫明iPhone 3G 係「Unlock version 」，幾光明正大，但有啲就冇寫嘅。
只平行貨$20
我再問鬼機昌覺得聯通批iPhone 3G 掂唔掂，佢話全世界都用同一個software 解鎖，佢哋啲機咪等如先達啲機，只係人哋係大公司，有自己解鎖同整機師傅，又唔會突然執笠，有起事嚟搵佢哋跟手尾係穩陣啲嘅。但都要價錢夠抵先買得過，我再望吓佢哋個價錢牌，嘩，原來16GB 要$6,080 ，8GB 更賣成$5,380 ！等我提番善忘嘅讀者，Apple Store 賣緊嘅淨機都係$6,200 同$5,400 咋！即係只爭$120 同$20 ，買唔使解鎖又有官方保養嘅行貨淨機好過啦！
我響旺角間中國聯通捕到天黑，連隔籬中國移動萬眾閂咗門佢都仲做緊生意，人客都幾多，但冇乜人問iPhone 3G ，可見個價唔吸引。
上到大陸冇保養
雖然大陸大型電訊商中國聯通，響香港有上市又有門市，但一睇佢招牌個公司名仲係用簡體字，就知佢嘅主打客路始終係自由行。大陸同胞買手機邊會理你有冇保養，最緊要平之嘛，所以只會買水貨，中國聯通為迎合佢哋，就不嬲都係賣水貨為主。但經軟解嘅iPhone 3G ，出事機會實比其他機高，而佢哋嘅保養只響香港有效，上到大陸就貴客自理，咁搞法，連買機畀大陸親戚用都制唔過。
中國聯通賣嘅機9 成9 係水貨，只有少數hit 款機先會賣埋行貨，但iPhone 3G 冇。
軟解仲未穩定
中國聯通啲水貨咁貴，好失望咁又走番去先達，睇吓過年後啲軟解iPhone 3G 有冇跌到價，點知都係企硬8GB $4,780 同16GB $5,680 ，仍然唔算平過行貨淨機好多。鬼機昌仲話而家個軟解軟件Yellowsn0w ，始終仲未好完善，冇一個解鎖佬可以100%保證解鎖後部機嘅接收係完全冇問題，睇嚟我都係放棄水貨算數。
好多先達鋪貼晒紙話專業解鎖，其實咪又係上網睇高手教學嚟偷師，有幾專業呢？
以為貼住個爆花特價會特別平，原來特價指平過3HK 上台出機嘅最低$188 月費加2 年約，吹脹！
去百老
買iPhone 3G 淨機，仲要畀晒錢再簽埋Apple 聲明先畀你試機，好鬼煩！
多數Apple Store 嘅貨品都冇得用信用咭分期付款，但iPhone 3G 咁hit ，梗係例外，用Citibank 同Manhattan 咭就有得做分期。
百老匯淨機冇分期
於是我再行吓西洋菜街，竟然又見到百老匯啱啱有行貨淨機賣，標價一樣係8GB $5,400 同16GB $6,200 。仲諗住講吓價會平過上Apple Store 買，點知sales 話畀現金都冇得減價，碌咭仲要一炮過，連分期都唔得，搞錯！Apple Store 都有得分期啦，左計右計，都係上網買最抵最方便！
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
