街機版「Street Fighter IV 」（「街霸4 」）造得咁靚，今個禮拜推出嘅家用版有冇得鬥？日前小記已經試過遊戲正式版，無論畫面、動作流暢度等，都完全跟足，不過爭在專用大手掣未運到，玩得未算最爽。「街霸4 」家用版追加多項新元素，好似加入Sakura 、飛龍等6 個新角色，最正係可以邊玩Arcade Mode 邊等各方高手連線挑機，只要買埋個專用手掣就真係Perfect ！撰文：布偉倫
25 角色任打
由於現時兩部次世代遊戲主機的機能都有番咁上下，要移植街機遊戲已經冇太大難度，效果更差不多達到百分百。家用版完全收錄街機版16 個基本角色如阿龍、阿Ken 、春麗及E.Honda 等，仲有埋3 個隱藏角色Seth 、剛拳同豪鬼，而且更追加6 個「新」角色，全部喺以往幾集中出過場，好似水手服Sakura 、李小龍上身飛龍、占卜師Rose 、搞笑角色火引彈、由機迷投票選出的Cammy ，以及喺第１集就出場、人稱「耶穌」嘅傳說暗殺者Gen （元）。同樣地這6 個新角色都一樣係要Unlock ，試玩過程中只用原本的16 個角色，但仍無阻操機的興致。
必搶專用大手掣
用原本遊戲機手掣打「街霸4 」真係有啲唔自然，即使習慣用手指公捽半圓，重拳同重腳掣都被迫放在R1 同R2 掣上，
得唔爽快，所以既然打得「街霸4 」就唔爭在買埋專用大手掣。今次Capcom 會返日本Hori 廠同美國Mad Catz 廠所出的「街霸4 」專用大手掣，不過各地貨源都好緊張，據講每款都只係返到幾百套，應該好快就清倉，見到有貨就好買
。
為遷就家用平台，家用版加入多個要用時間慢慢煲嘅新遊戲模式，例如Challege Mode 入面Time Attack 同Survival Mode ；而對於技術所限唔敢打街機的朋友，Training Mode 就好
玩，唔使不斷入錢都可以睇住出招表練功。
邊打邊等人挑機
相比之下，連線模式先至係家用版主角，當中Ranking Mode 更為好多玩家所期待，網上對戰成績會記錄在Server ，打得幾勁或幾差都呃唔到人。排名高怕冇人嚟對戰等到蚊訓？今次「街霸4 」妙在可以畀玩家邊玩Arcade Mode 邊等其他玩家來挑戰，到有人挑機時先轉入對戰畫面，感覺似足街機，而且畀人K.O.都唔使再入錢。
PS3版本同Xbox 360 版本以同價推出，畫面同模式基本上都一模一樣，不過PS3 版會多了Install 功能；無論係邊個版本，都設有日文及英文顯示，視乎大家主機所選擇的語言而定，對於「日文」死硬派嚟講，都唔一定要買五、六百元的日版水貨，留番啲錢買個大手掣好過。
街霸4 同PS Home 搞連動
PS3版「街霸4 」除了多了Install 功能，等大家可以將遊戲安裝至硬碟加快讀碟速度外，亦同PlayStation Home 進行連動，截稿前只得日本公布有關詳情，不過各亞洲地區包括香港都應該好快玩得到。大家可以在PS Home 內買到「街霸4 」服飾同Figure 公仔等道具，仲可以在Lobby 內約戰打「街霸4 」兼即時連線開波，唔知此舉會唔會令大家重新「住」番PS Home 呢？
遊戲資料
類 型：格鬥
開 發：Capcom
平 台：PS3 、Xbox 360
推出日期：2 月12 日
售 價：$388
查詢電話：2725 3338
