好少會畀錢買軟件，不過Slovoed 可以即買即用，而且有咗個code 後，換咗手機都用得。
唔係話黑心，靈格風執笠筆者一啲都唔意外，起碼咁多年嚟我都未見過有人響街用，戴住咁大舊嘢出街咁樣衰，真係搵鬼同你隨時隨地學外語！筆者女友都特別鍾情外語，所以學外語更係我哋嘅節目之一，最新搞作就係學法文充有品味。
為咗等女友可以真正隨時隨地學外語，身為男友點都要諗啲方法幫手，結果先買一部有QWERTY 鍵盤嘅Nokia E71 ，然後就搵個好用嘅字典軟件裝落手機。最慘係上網搵極都係得試用版，想搵個免費得嚟又好用嘅真係超難！結果搵到Slovoed 呢個超強嘅字典軟件，雖然要錢，但免費試用版已經極好用，有晒相關字庫同發音，而且試用版都可以用到14 日，算係唔錯。
試用完覺得太正，終於都畀咗64.95 美金買埋完整版，計起要成$506 港幣，但都平過買部字典機，而家一拎部電話出嚟就用得，又細又方便。而由於筆者只係學緊法文同日文，其他外語網都唔多識，所以只可以將幾個親身試過嘅網站推介畀大家，齊齊增值。
WordReference.com
呢個網站乜文都有，勝在仲有埋國際音標同例句，不過就唔可以成句翻譯，只可以查單字。
網址︰
http://www.wordreference.com
Slovoed
由WM 到S60 手機都啱用，仲有埋Windows 版本，電腦都用得，而且醫學同法律等專業辭彙都有埋，做功課一流。
網址：
http://www.slovoed.com/
東京外國語大學
讀日文就以呢個東京外國語大學嘅網站唔錯，同香港啲日文班嘅課程差唔多，而且註釋夠，自學好方便。
網址：
http://www.coelang.tufs.ac.jp/modules/ja/
About.com
好啱初學者嘅網站，每星期都會用e-mail 寄教材畀你自學，由淺入深，而且仲有西班牙文、意大利文同德文等歐洲語言。
網址：
http://french.about.com/
