報載經濟變壞，旅遊首當其衝，210間香港旅行社就快爆煲。好在有羅拉挺身而出，今集《盜墓者羅拉8》將會到世界各地尋找地下迷城，好似去暴動嘅泰國打老虎，去海盜橫行嘅非洲索馬里海打魚，唔辣嘅地方佢都唔去。
咪以為我講笑，台南都係靠一套《海角7號》帶旺旅遊，如果呢幾個團都搵個羅拉咁好身材嘅索女做導遊，可能好多人打完game 爭住報團！
機種：XBox360/PS3
類型：Action 解謎
人數：1人
售價：$298/$328
查詢：i-gamer （27253338/ 深水
福仁商場地面G16號鋪）
五星級靚景行程
畢嫂套《盜墓者羅拉》電影版屬大路action 片，但game 就唔係一般動作過版，你要用精巧技術跳樓、爬牆、開機關，以有限嘅體力、武器，一步步深入版圖深處大奪寶，目標係奪取威力絕大嘅「雷神之鎚」，搵番迷失於時空嘅親生媽媽，幾考玩家智力同耐性，冇耐性嘅人唔好報團。
打海盜殺鯊魚
今集最新玩法係打水戰，有支魚槍畀你打鯊魚，之後仲要潛入一艘俾海盜騎劫嘅貨輪。《TR 》多數係去古墓同大屋冒險，呢個版圖算新鮮。佢唔會懶真實咁計你氧氣量，潛行升降嘅操作，用兩支analog 已經可以操作自如，可以全心全意搵寶物。
今集創作組製作咗泰國、非洲新地圖，又增加水中戰打鯊魚，連水上活動都包埋，呢個團啱晒後生仔！
泰國打虎
之後羅拉就要去泰國虎廟「帕朗塔布寺」（真有此地）搵古墓，仲會撞到攻擊力超強嘅老虎，想走佬定今晚打老虎，自己決定。不過以《Tomb Raider 》習慣，其實啲動物好多係強到打唔死，反正佢哋唔係壞人，打唔過，走佬啦！
釣大墨魚
走入第1版深海古墓，開頭會隱約見到啲黑色「條狀物」出沒，搞到怕蛇嘅筆者好驚，後來發現其實係大墨魚波士嘅觸鬚，要快快搵機關，利用天井上嘅尖刺石平台壓死佢。至於點解頭上有件咁嘅利器？講古請唔好駁古！
射擊跳遠
羅拉除咗有招牌雙槍，上集開始仲多咗支蝙蝠俠飛索槍，見到地圖上有X 字樣就可以按掣射擊，條繩除咗用來爬山，仲可以再按Y 掣扯爛大石，打開機關。如果按完Y 冇反應，羅拉又擰吓擰吓頭，即表示角度唔啱，要換方向再試。
暢遊火山
玩《盜墓者羅拉》，最先要學嘅就係跳躍，唔同打《GOW2》，你要想清想楚先至好行，跳錯一步變燒豬。要玩得好，請響第1版序章學好各種基本操作，咁就會玩得爽手。
1至4集 仲係PSone 年代，樣子唔靚，而家睇番對胸真係好異相。
5至6集 呢期有安祖蓮娜祖莉做真人版，PS2版面相有少少邪氣，對大髀亦瘦咗。
7至8集 進入PS3、360時代，羅拉嘅樣同身材比較真實。
12年8變羅拉
8年來《Tomb Raider 》當然唔只地圖靚咗，羅拉嘅多邊形身材都愈來愈索，個樣愈來愈姣，即睇佢8變身材。
玩家開game 時仲可以揀難度；愈難，地圖可掃描嘅範圍就愈細。
真係玩唔掂，NB 內仲有Hints 一欄，按X 掣羅拉會畀少少貼士你，再唔得，可以按Y 掣，佢會畫公仔畫出腸地教晒你行下一步點做，例如要搵機關擋住道門等等。
Netbook 導遊夠細心
可能因為版圖愈搞愈大，而且啲多邊形貼圖愈來愈複雜，想搵條路行吓都唔易。所以今集羅拉會有部netbook 跟身，隨時可以開3D 聲納地圖，畀你逐吋逐吋睇清先至行。按select 打開netbook ，揀Sonar Map 就可以睇地圖，為咗保持難度，佢只會顯示羅拉方圓10呎空間，勁人更加可以忍手唔用，考驗自己嘅能力。
總評 闔家啱玩
呢隻game 出名難玩，但可以見到Eidos 不斷咁加入新嘅元素，又有NB 幫你解決難題，最貼心係，以上啲功能你可以自己選擇用定唔用。情況就好似去旅行揀跟團定自由行咁，真係夠晒自由，闔家啱玩！
