當年一手日語漢字遊走於潮流雜誌《Milk 》、《TEA 》之中，各界迴響有好有壞。好的是，有人欣賞照跟期期追住睇；壞的是，發明的那幾位差點被怒罵漢奸！一波起時另一波又起，被人嘲笑的「戴帽高八吋」熱潮爆發，支矛直指那幾位仁兄有份參與的SillyThing ，記得某年更被某傳媒選為最差品牌。既然反對聲音如此多，是時候請當事人現形解構思想，有請，當中仁兄Bebop-bit （迫爆氏）登場。記者︰吳美美攝影︰Tai Sze Hing from 《Milk 》Location ︰Think Silly Store
一個潮童的成長方程式
即入正題，以下方程式，大家點睇？MA1軍褸+超窄單車褲+12孔Dr.Martens =中三時的Bebop-bit這個衣著組合聽落已令人想入非非，現時三字頭的Bebop-bit 回想當年︰「過陣時我仲為咗呢套衫而專登剃腳毛，但我都唔知自己點解要剃，我諗應該係自己最爆嘅一件事。」自言小學時期常用近半支定型水Gel 到好米奇老鼠耳仔咁返學，Fashion Sense 已經微微飄起，不過對時裝的熱愛還是來自那鋪音樂癮︰「有一段時間好鍾意Metal Band ，咁就學佢哋著衫。細個嘅時候係聽Guns N\'Roses 同Metallica ，佢哋啲牛仔褲就好似皮咁貼住隻腳，覺得好鬼靚，咁我就去搵。但過陣時香港無，我就去廟街、女人街度勁搵勁摷，買咗好多條但都唔係過個款，一路都好渴望，但最後達成唔到。」愛時裝的人都愛看雜誌，尤其來自東洋的那批，Bebop-bit 中一、二時期已經同同學仔夾份買《Men\'s Non-no 》、《Checkmate 》等雜誌︰「最鍾意睇Snap-shot ，記得日本人著啲Worker Boots 殘得嚟好乾淨好靚，一班同學仔就跟住走去專賣工衣嘅舖頭買類似嘅鞋，然後買砂紙一齊勁磨。」
■Think Silly Web Zine
五十年代最有男人味
後生細仔，總有追求牌子的時候，Bebop-bit 想了良久︰「唔……無鍾意特定牌子喎，因為細個又無乜錢，反而會追捧Style 。如果而家就鍾意LANVIN 個設計師，覺得佢好得意，好似個波。而佢設計嘅西裝褸佢自己都著得好好睇，又戴住個大煲呔好得意。」家陣成日見到Bebop-bit ，經常戴住紳士帽連恤衫示人，好明顯受到某些東西影響︰「我好想學五十年代美國黑白電影中，留二撇雞梳蛋撻頭嘅人，戴紳士帽著三件頭西裝。以前嘅男人真係有好強烈男人味，但而家嘅男人係男仔！」講開西裝褸，從前是Bebop-bit 之天生死敵，已經試過不下數萬次被人話著起嚟似部長、幹部、CID ，但今次拍攝時卻大膽披上，證明已克服成功。另外，眼鏡又是一件Bebop-bit 難以用上身的單品，但最近已聽他逐步放寬對眼鏡解禁，買了一副Moscot 膠框眼鏡。似乎，無任何嘢再可以難到佢，厲害！
潮牌文化傾心Porter
有份參與開設時尚店Think Silly Store 的Bebop-bit ，無論自身傾向與工作關係，都經常接觸到日本事物，經過多次體驗後，總有最難忘體驗，「由吉田克幸先生帶領的Porter ，曾經因為合作關係而有機會了解公司運作情況。你會發現成間公司文化好屋企、師徒關係好緊密，跟師傅做嘢之餘亦都學緊做人，大家互相照顧。雖然呢樣嘢好多人都知，但你真正見到佢哋相處，會覺得好深刻。」講起衫，Bebop-bit 亦有某種癖好︰「我好鍾意熨衫同摺衫，熨衫嘅時候我會有一種好平靜嘅感覺，個腦喺呢段時間係無諗過嘢，無形中係會幫助消減咗啲壓力。而摺衫我就好鍾意摺到一棟棟，好整齊乾淨咁樣。」果然風格獨特。
變身Web Zine 編集總長
2008年是Think Silly 很重要的一年，好像所有都重新再開始，現時貴為Think Silly Web Zine 編集總長（總編輯）的Bebop-bit ，解釋了當中理念︰「08年對ThinkSilly 好重要，店舖同網上雜誌同一日Re-launch 。搞網上雜誌好大程度上係因為我哋喜好唔同咗，之前亦未曾涉獵過呢方面，當中內容，都係反映我哋現時嘅自身風格，亦比較Open ，唔理邊個牌子或者類型。例如車，我哋覺得其實可以深入啲，但又唔想太過似坊間試車報告，所以，著眼點會偏向呢部車出現於市場嘅意義。同時網上雜誌可以係一種紀錄，隨時可以搵番Archive ，一個幾方便嘅媒介。」
Bebop-bit\'s 飛佛a.Junya Watanabe 紳士帽
「香港好熱，有好多紳士帽嘅質料都比較厚，但呢頂帽嘅質料十分之通爽。」
b.Wolf\'s Head 腰帶
「呢條腰帶是日本方面全人手做，佢最招積嘅地方就係你訂咗貨畀晒錢都唔知幾時收貨，Waiting List 超長。」
c.Wacko Maria Tailored Jacket $5,380
「呢件應該係我第一件敢著上身嘅西裝褸，Cutting 方面相當好。」（小記就超鍾意心口上面嘅藍色花形Brooch 。）
d.SillyThing Tailored Jacket $3,380
「件褸用到防水等高科技物料，加上有帽，係我飛佛。」e.W)TAPS 紳士帽
e.W)TAPS 紳士帽
「拍攝Juno 嘅《林民龍》時，有張相要齊齊跳落水，其中有一張就係影到我半空戴住呢頂帽。」
f.SillyThing ×Herm
s 手帶
「仲有紅、綠色，是當年為我哋品牌而做的非賣品。」
g.Porter ×Eric Clapton Tanker Waist Bag
「有次工作上與Porter 主理人吉田克幸合作嘅時候送畀我，都係非賣品嚟。」
後記
與Bebop-bit 相識兩三年，已深知佢係一個搞笑能手，小記認為佢絕對有資格走「王祖藍」路線（希望揚言要走紳士路線嘅佢唔會介意小記咁講）。鏡頭後，佢經常乘攝影師不備擺出爆笑Pose ，奈何小記身上沒有相機，實在可惜！同樣可惜嘅係，Bebop-bit 為是次訪問，專登返老家找尋最愛單品，一拎就是三個巨袋，最後版面只能刊出絕小量，實在不好意思兼感激！
