溫文敦厚的Keith ，拍照時刻意穿上《狐忍》tee ，宣傳之細心見微知著。
十年前，如果你問我打機有乜實質作用，我只會答你「kill time 、消閒囉。」但如今打機已經是「搵大錢」的代名詞，電子遊戲已為全球最賺錢的消閒產品之一，市場以百億元計，打機打得叻，更可以成為pro gamer ，年賺百萬。
像剛過40歲的Keith Chan （陳順剛）。
作為全歐洲第三大遊戲軟件商Ubisoft （代表作是《Rainbow Six 》同衰衰格格的《賤兔》）亞洲分區經理，他從小到大都是瘋狂game 迷，利用通宵打機過版的熱情與決心，化為工作的原動力，在10年內將只有他一個人的Ubisoft 香港分部，發展為擁有7名員工、坐擁千呎無敵海景office 的公司，業績亦由頭一年不夠100萬增加至超過4,000萬。他現時負責開展香港、泰國、台灣、新加坡4區的業務，是Ubisoft 亞洲分部最高職位華人。曾經因為搞event ，連續兩個月沒有放過假的他笑笑口說，「我班老細就係貪我我由細打機打到大，每隻新game 我都知佢賣點喺邊，咁先可以重點做宣傳，以最少成本做到最大宣傳效果，尤其喺逆市，呢招就更加見使。」
歐美大熱game ，香港未必會受，好似呢隻滑雪板game 《Shaun White Snowboarding 》，喺歐美熱賣，但香港人對滑雪板唔認識亦冇感情，Keith 寧願將注意力集中喺其他動作game 好似《Far Cry2》同《End War 》等。
Keith 所效力的Ubisoft 來頭不小，公司總部在法國，是全歐洲第三位遊戲生產及發行商，代表作包括《Rainbow Six 》系列、《波斯王子》系列，以及近年大熱的《賤兔》系列。Keith 這個分區總經理，專責決定他所管轄區域的入貨數量，將遊戲分發到各區的門市售賣，另外又要與地區發行商商討推廣、宣傳遊戲事宜，以及親自度橋推廣遊戲。外形似大學講師的他，雖然不像PS3（SCEH ）那邊市場部揸fit 人項明生般是時尚風頭躉，卻一樣是宣傳高手，從訪問開始已經表露無遺。例如拍照時一早擺定三部主機以免「大細超」、又穿起《狐忍》tee 宣傳其產品，此外，10年來亦多次成功設身處地將gamer 的觸覺，運用在遊戲市場上。
跟上司Sam Stewart 既是上司亦是朋友，Sam 對Keith 的辦事能力大加讚賞。「大家合作得好愉快，佢成日嚟我哋嘅家庭聚會㗎！」Keith 說。
見微知著 同行大讚
在他旁邊的上司、Ubisoft 的亞太區總裁Sam Stewart ，亦笑言Keith 是一個觀察力極強的game 迷：「佢好明白亞洲市場需求，從而作出最合適嘅市場策略，例如我哋公司有隻滑雪game 《Shaun White Snowboarding 》，喺歐洲大賣，阿Keith 就同我講，話香港、新加坡冇雪落，隻game 對於亞洲玩家嚟講唔會太投入，反而《狐忍》（港譯：火影忍者）因為原著係日本人氣漫畫，香港都好hit ，所以比較易推廣，另外佢喺香港遊戲界打滾咁多年，同香港區業界負責人都熟到不得了，傾起推廣自然駕輕就熟。」
SCEH 的高層，同樣是該公司最高職位華人的項明生，亦大讚Keith ：「我同佢識咗10年，佢真係識game 喎！所以傾合作都事半功倍。好似去年遊戲展催谷第一身射擊遊戲《Haze 》咁，佢好明白隻game 嘅特色，宣傳上重點都放喺連線功能上，又強調隻game 全程冇中斷讀取，凸顯到PS3機能，從而收到極大宣傳效果。另外佢做事果斷亦令我印象深刻。好似喺四川賑災期間，我地呼籲各大遊戲商慷慨捐輸，Keith 即時爽快應允，第二日就捐咗一大批贈品出嚟，好有擔當！」
作開荒牛 練就市場觸覺
TVB 陳總早前接受《青雲路》訪問，曾經講過若想事業成功，一定要真心愛上該行業，Keith 就是一個人辦。他原是個機癡，日夜作戰影響會考成績，在中學時期家人便送了他過溫哥華讀書，大學主修電腦及經濟，96年回港找工作，看到一則「電腦遊戲軟件部門採購」的招聘新聞，見到「遊戲」二字便如喺了魔一樣，二話不說走去應徵，原來是當時全港最大的影帶租售連鎖店金獅招聘人才。打機的投入、對市場的了解，成為他日後工作的最大資本。
「面試員聽到我如數家珍咁講遊戲，對我印象已經大好，再加上我由溫哥華返嚟，英文算過得去，所以就請咗我。」上工後第一件事，就要聯絡遊戲雜誌負責人、本地遊戲公司負責人。「打電話、走記招，總之就盡量建立人脈關係，咭片多多都唔夠派。」當時認識的行家，如今很多已成為遊戲界高層或領導人物，項明生便是其中一人，成為今日Keith 推廣的一大好幫手。
就因為Keith 日夜對喺game ，對香港電子遊戲界已有一定洞察力，見工時已分析得頭頭是道，當時香港家用機市場，95%都是日系天下，只得電腦遊戲歐美作品佔6成市場，有極大發展空間，阿Keith 說他從這個潛力極大的市場學了很多東西，最刺激的是與遊戲商bargin ，他形容根本就是一場攻防戰。「遊戲商想你有咁多入咁多，梗係講到隻game 好勁啦，做買手嘅一定要了解市場需要。我係機迷，明白到嘅滑雪game 、美式足球game 喺香港唔會受落，因為呢啲運動喺香港唔hit ，玩起上嚟唔會投入。」在金獅工作之時，他的判斷力極得上司信任，更派他到美國，出席遊戲界最大規模的展覽會E3中負責入貨，認識了不少國際業界行家如Ubisoft 的銷售主任Melanie Re 。98年金獅在金融風暴中宣告結業，未到last day ，阿Keith 卻收到Melanie Re 同事Corinne Le Roy （現任Ubisoft 中國製作室總裁）招攬電話，原來就因Keith 的三大強項：英語良好、人脈廣、懂市場，MelanieRe 一向欣賞他對亞洲遊戲市場的見解及語文能力，適逢Ubisoft 開拓亞洲市場，便引薦他加盟作為銷售主任。
附Game 禮品三寶
1水樽
隨《Far Cry 2》這隻FPS game 場景主攻非洲，去非洲打仗更要隨時補充水源啦，送水樽正好配合主題，5,000個水樽，頭二日已「送完即止」。
2啤牌
話明係「拉斯維加斯」，一諗就梗諗起賭場啦，出啤牌就「入型入格」
！
3腰包
有名你叫《Brothers In Arms 》一場兄弟，帶埋腰包一齊去打仗，夠晒可靠！
Keith （右）偶爾也需要到法國出席會議及活動，像08年5月Ubisoft 自家舉辦嘅推廣展Ubidays 就飛往法國與行家互相交流。
低成本 搞大宣傳
就這樣，Keith 一人一枱又開始作開荒牛，一開始已負責開發5區業務（02年韓國另設分部）。最初半年Keith 主要做資料搜集，了解亞洲區機迷的喜好，他認為戰略、動作、運動一定是大熱門，尤其旗下的《Rainbow Six 》、Tom Clancy 遊戲系列是長勝將軍，於是重點推介有關遊戲。
做宣傳方面，Keith 亦有「低成本高效應」、「以快打慢」兩大強項。前者最彪炳的戰績，首推03年暢銷大作《Rainbow Six ：RavenShield 》，在香港搞推廣遊戲一役，由籌備至執行主力只需4個人，成本效益爆燈。「香港初賽，我同同事落手落腳call sponsor ，有一間cafe bar 都好快應承贊助場地，一個仙都唔使畀，不過就『月中無休』，因為每個星期六都搞初賽，我哋要做埋司儀同監場，又要寫rundown ，兩個月放冇放過假。決賽嗰日就搵荷里活廣場提供場地，因為隻game 本身好出名，又因與當時一本遊戲雜誌合作，咁岩商場想搞嘅岩年輕人口味又創新嘅活動，三方一拍即合，商場提供場地，我哋提供人手、獎品（獎杯及一些遊戲軟件、電腦軟件）。至於其他國家參賽者嘅食宿、交通，因為事先同分區夾得好好（亞洲其他分區公司已另有該地專人統籌），一早on scheudle 安排好晒，成件事進行得好順利，當時好多game 書、雜誌都有報道呢次活動，如果要買廣告都要十幾廿萬，但我哋全程用咗10萬蚊唔使。」
今年8月10日至23日在荃灣廣場舉行的最新遊戲《賤兔2》宣傳活動，又係另一低成本高效益示範，Ubisoft 與香港某潮流雜誌合作，對方大力宣傳，商場提供場地及布置，Keith 於是找來得意易玩嘅《賤兔》作主題，以配合商場老少咸宜的形象，他們自己則只提供人物圖片資料及一些宣傳產品，幾乎零成本，最旺星期日估計單日人流超過5,000。「我見到有個小朋友攬住個巨型賤兔唔放好鍾意，真係畀到我好大滿足感同成功感。」
03年荷里活廣場搞《Rainbow Six 》跨國打機大賽，十幾廿部機連線打，同類型及規模比賽，當時絕無僅有。做埋司儀的Keith （小圖）話好開心香港隊嗱冠軍，頒獎都頒得醒神嘅！
荃灣廣場搞《賤兔》show ，而且場地布置全由商場提供，彼此配合做到宣傳。
以快打慢 贈品頂水貨
已成為遊戲界高層的他，說做遊戲最大困難是要同水貨鬥快。04年以前，Keith負責的業務9成是PC Game ，後來Ubisoft 在04年發展家用機業務，Keith 開始配合家用機需要，更加要與水貨競賽，最突出一役是06年成功與Xbox360出主機日同步推出的大作《Ghost Recon Advanced Warfighter Xbox360》，他形容追船期、貨量，刺激過打戰略game 。「咁大日子，隻game 一定要同日見街，追船期嘅追魂call 一日十幾個，因為不容有失！幸好都追到同步推出，隻game 亦成為06年最暢銷Xbox360遊戲。」
另一鬥快絕招，就是買行貨送贈品，加強競爭力。「呢招都幾有效，好似隻《FarCry2》送軍用水樽，5,000隻game 兩日內就送晒！」其他地區亦各有推廣秘技，例如新加坡情況近似香港，亦要與水貨鬥快，但該地以英語為主要語言，推廣較易；台灣區，因為英語程度問題，預算許可的話，盡量推出中文版或者中文包裝；至於泰國，盜版問題實在猖獗，部分遊戲惟有推出便宜的泰文包裝版，價錢大概為英文版的1/3至1/4，起碼盡力養成機迷買正版的習慣。
面對金融海嘯，Keith 反而樂觀面對。他說上次美國98年經濟衰退，遊戲銷售反而上升，冇錢娛樂，煲機反而係減壓一大樂趣，他會趁機走低成本、高效益路線。
晉升階梯
除了控制成本得宜兼廣結善緣，Keith 另一令公司信賴的強項肯定是「口密」，絕口不提年薪數字，只肯透露作為香港遊戲總經理級，普遍年薪大概為$50萬至$100萬左右，自己則誓神劈願「一定冇七位數」。
後記：Be a smart gamer,baby !
言談間知道Keith 將為人父，咁會唔會鼓勵囡囡打機呢？「唔好沉迷就得
！同埋以前我哋打機，會學到好多意想唔到嘅知識，例如打戰略game ，會學到嘅英語軍事名詞，寓娛樂於學習，咁都幾好呀！同埋，女仔嚟講，岩玩多嘅casual game 好過玩打打殺殺嘅，我會陪佢玩《賤兔》㗎！」愛女之情真誠流露，有意無意宣傳埋公司產品，囡囡，學吓爸爸做個smart gamer 都好㗎！
