有人話潮流近幾季都無新意，來來去去都係懷舊。但計我話個Trend 轉得不知幾快，上季先剛剛懷完八十年代的舊，眨吓眼又輪到九十年代。最估唔到是停產多年、90's 勁熱學生袋王Lineabold 都有得翻生！今季由Bauhaus 與生產「Bold 袋」的意大利品牌Piero Guidi 攜手復刻推出紅綠橙Multi-colour LineaboldCollection 。當年做學生哥買唔起，家陣終於可以一償心願。
記者：葉雪芯
攝影：楊錦文（Model ）、陳盛臣（訪問）
Model ：Sarah Chan @ MMHK
Makeup &Hair ：Xavier
■黑色小手挽袋$4,550
■黑色肩帶袋$2,890
■Multi-colour Lineabold 復刻版背包$4,680
九十年代集體回憶
■Multi-colour Lineabold 復刻版腰包$2,960
咩叫集體回憶？就係隨口問身邊同齡的同事心目中的Dream Bag學生袋，起碼有1/3人答「Bold 袋」（弊！唔小心暴露了年齡的秘密）。Lineabold 這個名詞簡直是成長於九十年代學生哥的符咒一樣，好命嘅，佢有幸做到你人生中的第一個名牌袋，作為平民，Lineabold 到今時今日依然令人恨到流口水。
多得個Trend 轉轉吓又轉到懷90's 的舊，回憶總是美好，學Wyman 話齋，好嘢梗係唔怕一叮再叮，今年終於輪到翻「Bold 」喇！由Bauhaus 一手策劃與Piero Guidi 攜手復刻出Lineabold Collection 中三款經典的設計，早已絕跡香港的方形腰包、公事包及背囊再次現身。三款設計完全參照元祖版本製作，用最Signature 的彩色特製布料打造，保留鋼牌刻名及地址服務，復刻得原汁原味。
B 記老闆情意結
■Piero Guidi 六十幾歲，Bold 袋紅了咁多年才首次訪港。
我哋呢班「老鬼」之所以得償所願能翻買Bold 袋，補償當年心靈上的缺憾，都要多得有人陪住癲。據知Bauhaus策劃這次Re-launch ，全因老闆的情意結，當年起家四出周遊列國入貨就係全靠Bold 袋陪伴走天涯，至今對Bold 袋餘情未了決意再引入。另一位「多得他」一定是Lineabold 創辦人Mr.PieroGuidi ，Bold 袋在香港紅了二十幾年從未到訪過，今次Re-launch ，六十幾歲高齡都堅持要來港贈興，認真畀面！
創辦人：原是Banker 袋小記比大家幸運少少，可以近距離親身訪問佢老人家。PieroGuidi 說當初想不到Bold 袋會成為學生哥至愛：「我設計Lineabold 的原意係作Banker 的TravelBag ，Lineabold 於八十年代誕生時，開始多遊客和銀行家出國旅行，於是想設計一個耐用又款式高貴的旅行袋，全部袋的用料都係鋼、皮革等較堅固的質料做主材，並在袋款之上加上一塊獨特的鋼牌，畀用家刻上自己的名字及地址作為Name Tag 。估唔到九十年代來到香港會咁受學生歡迎！」事實係潮流齊齊跟，當年Michael Jackson 、英國型男Sting 、美國Fashion Icon 一姐Madonna 都力撐，的確好難唔Hit 爆。不過問到老人家為何如此有興致再Re-launch Multi-colour Lineabold ，他說：「好開心咁多後生仔支持，時間過咗咁耐大家都仲記得Lineabold ，已經印證咗佢喺潮界有地位。停產咁耐再復刻變成Fashion Items ，我都想Lineabold 多一批呢個Generation 的Fans 。」
■老人家只懂意大利文，特登帶埋仔仔來港做繙譯。
■晒冷一套六個由意大利總部空運到港的Vintage Lineabold ，全部陪客人走均全世界，Travel Tag 上刻了姓名及購買年份。
㗎妹翻煲熱爆黑Lineabold 唔止在香港翻生，亦在日本煲得起，今季新推出的全黑系列已成為㗎妹新寵，更加Hit 到在大阪、東京都開設了Piero Guidi 專門店。Bauhaus 亦有引入這批日本大熱的全黑秋冬系列，除了腰包、背包、公事包款式之外，更新推了小手挽袋、桶形索帶款、肩帶款、It Bag等Lady 款式。話埋畀大家知，買咗個袋有咩損壞都可以Send 返去意大利老家，幫你搞番掂㗎！
■黑色方形肩帶袋$2,420
■黑色長方形拉鏈肩帶袋$2,550
■黑色梯形手挽袋$3,780
■黑色桶形索帶袋$4,400
■黑色手挽肩帶兩用袋$5,790
■黑色公事包$5,230
Bauhaus （28916811）
銅鑼灣耀華街2號地下至3樓
■Multi-colour Lineabold 復刻版公事包$5,230
