消費blog ：半島包船包食遊維港 兩位$988
雖然呢排經濟唔好啫，小妹都好期待嚟緊嘅聖誕節假期，同男友睇吓燈飾，食吓聖誕大餐，浪漫一番。上星期半島酒店好姊妹Bonnie 打電話嚟，佢話今年半島繼續搞維港遊餐宴，呢個月16日到出年嘅3月12日，價錢比舊年仲平咗兩成，兩位收988蚊。
今年嘅半島維港遊餐宴，比舊年平咗兩成。陳亮華攝
金融海嘯襲港，連半島都要減價？Bonnie 笑笑口話，都唔係因為金融海嘯減價嘅，係因為舊年嘅套餐，會送多一支酒，今次重新設計套餐，發現搭船有香檳飲，晚宴有紅酒飲，今年決定唔送酒咪平咗咋，呢個價錢喺咁嘅時勢仲抵玩。Bonnie 仲叫小妹參加佢哋嘅體驗團。小妹梗係唔會客氣啦，上個禮拜三傍晚時分，小妹喺半島坐部由半島安排嘅60年代古典開篷巴士到尖沙嘴天星碼頭，再搭古色古香天星小輪遊維港，一邊飲香檳，一邊喺甲板挨住欄杆睇兩岸夜景，坐足45分鐘，好鬼舒服。落咗船之後，坐番巴士到酒店大堂茶座，嘆吓三道菜套餐，頭盤、主菜同甜品都各有三款揀。樣樣都想食，唔知試咩好，最後揀咗鮮番茄湯，燒牛肉配焗馬鈴薯，同埋瑞士蓮朱古力巴菲配桑子。大堂主廚Andy 話小妹都幾識揀，鮮番茄湯落足料成碗都係番茄蓉，燒牛肉份量十足，而朱古力更加係佢「飛佛」添。維港遊餐宴包車包船包食賣988蚊，仲有一張300蚊半島Spa 現金券送，計落都幾抵，話晒半島
。逢周六、周日刊出電郵：mailto:shoppingjing@appledaily.com
姓名：Shopping 精性別：女年齡：年年24歲興趣：行街買嘢、吃喝玩樂、做高溫瑜伽
