蘋果批--撤外傭稅：葉劉翻舊賬！
《蘋果批Online 》逢星期一、三、五晚上九時開騷Click 入http://pie.appledaily.com 收看歡迎透過web-cam 即時發表意見或致電29908648安排親身上場電郵：mailto:pie@appledaily.com網誌：http://pieatapple.wordpress.com
葉劉淑儀就佢嘅撤銷外傭稅議案，掉轉槍頭插政府，佢同勞工及福利局局長張建宗，噚日就喺立法會再次激出火花。與此同時，喺《蘋果批》論壇之上，葉劉再翻張建宗有關外傭稅上嘅舊賬……主持：楊卓華
1
睇番外傭稅嘅歷史背景，其實係03年2月由特首會同行政會議通過，當時葉太你作為保安局局長，係行政會議嘅官守成員，整個決定其實係咪你都有份參與？
葉劉淑儀：過時保安局好有保留，（保安局轄下）入境處其實強烈反對。因為佢哋係前線，知道一話出簽證收400蚊，又冇得refund （退款）……市民實嘈得好緊要。保安局一路都唔願意接受，一路都係（當年）做緊教育人力統籌嘅張建宗局長同我哋傾，最終係overrule 咗（保安局意見被推翻），即係較高層決定要收，我哋作為官員入到行政會議就冇得反對，要集體負責。
2
李兆富：葉太你作為過來人，喺行政機關坐過，都知道03年以來政府錯誤決定唔只一單半單……外傭稅早前話要暫停嘅時候，亦都搞到亂七八糟，你認為究竟係人嘅問題，定係制度出現咗問題？
張建宗局長於7月底公佈豁免外傭稅措施。
葉劉淑儀：（張建宗）局長同我哋講，（外傭稅）暫緩兩年之後，啲人發覺原來可以變咗四十七或者四十八個月，只要炒多佢（傭工）一次。局長就話：「我唔係教人走法律罅，係制度里面有（漏洞）……」但我覺得（張建宗如此說）非常唔好，即係教市民搵你制度嘅漏洞……我諗唔係純粹制度（問題），係有人為。我唔係針對任何人，譬如外傭稅，我最近見到另一個舊老闆鍾逸傑爵士，佢都話唔應該收。我諗英國人年代唔會收呢個稅，因為英國人價值觀比較覺得唔應該影響外傭。
3泛民點睇葉劉修訂案？
余若薇：我哋一向都反對政府當年用行政手段收取呢個外傭徵費，所以唔可以話今次係支持佢（葉劉），（有關議案）只係一個簡單嘅技術修訂。
何俊仁：我哋支持佢嘅議案，係因為我哋一向都認為呢個（外傭稅）係不公義嘅。
另外，工會有另一個睇法，認為03年開始徵收外傭稅時，政府係先將外傭最低工資減400蚊，咁而家撤銷外傭稅，亦應該將過400蚊畀番外傭，而唔係畀僱主，呢方面你又點睇？
葉劉淑儀：我諗外傭僱主條氣最唔順嘅，係自03年以來外傭人工已經加咗四次，加咗310蚊，距離未減水平只差90蚊。僱主氣憤嘅地方係400蚊（外傭稅）仍然係我畀……張局長成日都講，35年來，外傭（最低工資）增減機制係加多過減，減只試過兩次，都係睇一籃子嘅經濟數據──政府素來都係睇經濟數據……而唔係睇工會壓力或者菲律賓政府壓力。
