攞住三百蚊在香港食海鮮，可能只買到一隻龍蝦，不過這三百蚊轉到新西蘭的尼爾遜（Nelson ）就好用得多。這個位於新西蘭南島的沿海小鎮，靠海食海，海鮮絕非「海鮮價」，而是平到震，一個兩人分量的海鮮拼盤只需約三百蚊，食物堆積如小山，分量足夠一家人齊齊分享，今次仲唔大啖食盡海鮮？加上得獎Cafe 及餐廳，來到尼爾遜，一日三餐都是口腹享受。
特派記者：羅安琪
清晨Art Gallery 內歎早餐
一日之計在於晨，先歎個新西蘭傳統早餐，Morrison Street Cafe 連續7年獲得全市最好Cafe 的獎項，早餐尤其出色，Cafe 本身亦是Art Gallery ，店內到處掛滿了油畫，置身其中，好像在藝術館中歎早餐，情調特別好。
看看餐牌，單是早餐已有十款之多，有健康的粟米片乳酪，也有傳統的煙肉雞蛋多士或水果班戟等，我樣樣都想試，可恨只得一個胃呢！最後還是柯打最愛的煙肉雞蛋多士，分量比想像中大得多，一大塊半吋厚的多士，上面鋪滿了煙肉，既香且可口，還有兩隻滑溜溜的煎蛋。但怎樣也不夠朋友點的Morrison Street LocalBreakfast 誇張，兩大塊多士及煎蛋、炒蘑菇、香腸及一碗焗豆，連男生也吃不完！
正午 全市力捧得獎餐廳
到了午餐時間，問當地人推薦市內哪間餐廳，人人都說Hopgood's ，餐廳在2008年被選為全市最出色餐廳，並獲廚師及餐酒大獎。店內分酒吧區及用餐區，都以啡色為主調，配上木餐椅，甚有原始風味。
這裏食物種類繁多，海鮮、肉類、沙律及芝士等應有盡有，前菜先來個脆蝦肉配牛油果吧！炸得香脆的大蝦配上軟腍香滑的牛油果，一脆一軟口感極好，而主菜則選了酥皮焗威靈頓牛扒，鬆脆的酥皮包著多汁的牛扒，入口肉味濃郁，加上紅酒汁更是美味。甜品柯打了朱古力慕絲配雪糕，慕絲Creamy ，雪糕香甜，絕對是最佳配搭。食完好滿足，果然名不虛傳，還有甚麼可以挑剔呢？
Hopgood's Restaurant and Bar
地 址：284Trafalgar Street,Nelson
電 話：（64）35457191
營業時間：11:00am~12:00mn
晚上 豐盛海鮮拼盤
來到尼爾遜這個沿海城市，總要試試海鮮吧！於是晚上來到建在海邊的Waterfront餐廳。這裏地下是酒吧區，當地人喜歡放工後來個歡樂時光，而上層則以落地玻璃設計，可俯瞰醉人海景。想一次過嘗盡各種海鮮，店員推介招牌菜海鮮拼盤，就這個吧！
過了一會侍應捧著一大盤海鮮到來，分量大得驚人，鮮魚塊、三文魚、原隻蟹、青口、魷魚、大蝦等，堆成小山一樣，加上一大碗的番茄沙律，但Menu 明明寫住二人分量
？看來我睇小了外國人的食量了！不過海鮮的確夠鮮美，大蝦肉質彈牙，魚扒則夠嫩滑，蘸上店內特製的辣椒蒜泥醬汁，加倍惹味，食完飽到上喉嚨。
不想吃海鮮拼盤的朋友，亦可點其他主菜，好像三文魚扒，比我的手掌還要大，厚達半吋，加上配菜炒青豆、焗薯仔及番茄等，單是這個已非常飽肚，不用再叫任何前菜跟甜品了，信我吧！
Waterfront Cafe &Bar
地 址：341Wakefield Quay,Nelson
電 話：（64）35466685
營業時間：11:00am~12:00mn
遨遊 備忘
持BNO 及特區護照，毋須簽證可逗留90天
NZ$1約兌
HK$4.3
新西蘭航空直航香港至尼爾遜來回經濟客位機票由$7,590起
查詢：28628988
10月氣溫約
7℃~12℃
靚女侍應捧著二人海鮮拼盤，分量驚人，三百蚊，好抵！
想選擇分量少一點的朋友，可以選擇這裏自家製的蛋糕。
Morrison Street Local Breakfast 可說是分量最大的一款早餐，有多士、煎蛋、炒磨菇、香腸及一碗焗豆，NZ$16.5（約HK$71）。
早餐前先來 一杯熱烘烘的咖啡，暖身又醒神，NZ$3.5起（約HK$15）。
上層落地玻璃的設計，可一邊品嘗美食，一邊俯瞰海景，正！
超級海鮮拼盤材料豐富，有鮮魚塊、三文魚、原隻蟹、青口、魷魚、大蝦等，兩人也吃不完的，NZ$75（約HK$323）。
鬆脆的酥皮包著多汁的威靈頓牛扒，雙重口感，一樣好味，NZ$35.5（約HK$153）。
餐廳今年拿的獎牌都放在當眼位置。
