「無入息審查，即刻磅水！你收聲！」公公婆婆嗱一千蚊都仲要審查，又難怪毓民激氣嘅，但講到掟蕉洩憤，就有人撐有人彈，我就認為無禮貌啦。爆起上嚟 㩒都 㩒唔住，控制唔到自己情緒？唔緊要，今日教你入屋狂打七招自消憤怨，條氣順番晒，就連醫生都係咁推介，毓民早啲學識呢七招，就唔使畀人笑佢蕉出禍來啦，可惜！
記者：許維雅
協力：王震遠
攝影：伍慶泉
模特兒：阿浩
打床褥/ 梳化
喺屋企，同老竇老母鬧交好，同老公老婆鬧交好，可以第一時間走入房打嘢發洩，床，好自然成為最安全又最大嘅目標。葉醫生：「情緒比較暴躁嘅人，可以打床褥或者梳化發洩，床有彈弓，範圍又大，連埋被鋪一齊打包唔會受傷，打到手軟，出晒啲力就會無事。」
打咕
/ 枕頭
唔係人人間房都有厚床褥，所以咕
同枕頭都係唔錯選擇，有啲女仔甚至鍾意打公仔。葉醫生：「咕
，好處係隨手搵到，有時唔喺屋企，例如喺公司俾老闆鬧完，要搵個咕
嚟打都易得多。」
打爆袋
谷埋一肚氣？一啖吹入膠袋再一下打爆佢，爆袋聲分分鐘嚇醒自己，等自己唔好再發癲。葉醫生：「呢個都係發洩方法，吐晒自己嘅冤屈氣落膠袋，打爆佢寓意整走佢，心理上會有幫助。」
打水
嬲嬲哋，開桶水狂打，火滾
烚烚，既可以出力發洩，凍水又有助Cool down 情緒，呢招得唔得？葉醫生：「雖然未聽過打水，但呢個提議都唔錯，不過要留意小心受傷。你講到話水可以Cooldown 情緒，其實呢個已經係另一種Calm down 情緒嘅方法，我都成日鼓勵病人，一嬲就走去洗個面。」
打烏蠅
嫌打咕
打床太悶？想諗啲有趣啲嘅發洩方法，打烏蠅有成功感之餘，又可分散注意力，唔會好似其他方法咁無目標。葉醫生：「哈，有創意，同埋都幾認同分散注意力呢個睇法，打害蟲又有建設性，不過要等有烏蠅就麻煩啲。」
打舊報紙
我估，太用力嘅發洩方法未必適合女仔，女仔發脾氣鍾意打爛嘢多，破壞性較強，但次次整爛完啲嘢都會後悔。如果及時搵啲舊報紙畀佢撕爛糟質，又會唔會好啲呢？葉醫生：「呢個係最好嘅發洩方法，因為某啲人的確需要透過破壞嚟發洩，我會主張病人用力撕碎報紙多，因為越撕得細就越要用力，情緒會慢慢安靜落嚟。」
打衫
俾老闆蝦俾老婆鬧？掛起件衫，貼多張車頭相，出盡力打打打，打衫，感覺似打小人。葉醫生：「幾得意，有時幻想性嘅發洩都係有需要嘅，貼張相上去有助幻想舒壓，唔傷害到人都無所謂。」
三大要則
■Fullife 臨床心理學家葉妙妍
性情係天生嘅，有人牛脾氣，一扯火就無法 㩒得住，往往就會造成打老婆、打人、打爛晒屋企嘢嘅場面，身邊都有朋友試過玻璃割損手、打爆門要整番道門嘅情況，普遍都係男人多。Fullife 臨床心理學家葉妙妍醫生話：「需要打嘢宣洩情緒，多數係衝動、較難控制自己情緒嘅人，點解感覺會男人多啲，因為男人天生語言能力唔及女生，唔夠拗就好自然需要搵其他途徑發洩。最普遍情況係撼頭埋牆、用手打牆、打人，不論乜方法，其實目的只有一個，就係憤怒轉移，欺負弱小，就係想將唔開心轉移畀人嘅好例子。」
用打消除怨氣，葉醫生提出三大原則，第一，唔可以傷害自己；二，唔可以傷害其他人或嚇親人；三，唔可以破壞有用物件。「我成日同病人講，佢哋再唔試吓控制情緒，最後只會搞到好憎自己，搞到覺得自己好失禮，呢個下場最唔好。其實發火都唔係一下即到，你會慢慢感到全身發
、頭會好緊、手握得緊，趁未去到情緒爆發點之前，就應該即刻離場搵適當方法發洩。打嘢發洩係情緒治療一部份，打完之後收拾垃圾、清埋收尾嘅過程，都係收復心靈療程之一。」
咪有樣學樣！ 性格火爆嘅人一動氣，亂打發洩意料中事，電影亦有類似場面，不過所有角色都用錯晒方法，睇戲還睇戲，咪有樣學樣呀。
《導火線》：小朋友俾疑犯掟落地致死，禽獸不如，甄子丹飾演警察馬軍，監生打死疑犯洩憤。疑犯雖然無人性，但因怒氣殺人好愚蠢，令自己前途蒙上污點又何必呢？
《再說一次我愛你》：劉德華飾演髮型師Derek ，因老婆唔信自己而大吵一場，一怒之下打爆40吋LCD 。葉醫生話：「整爛嘢，要破財再買過，到時咪盞後悔？」
《父子》：郭富城飾演爛賭阿勝，女朋友狠心跟佬走，佢發茅打傢俬洩憤、打仔出氣。小朋友身心成長最受父母影響，見到你咁樣，你個仔可能會學足你亂發脾氣。
《偷心之約》：奇洛李維斯飾演廣告界紅人Nelson ，俾公司炒魷、女友走佬，返屋企發脾氣打爛獎座，結果插損手。傷害自己，分分鐘做成永久性傷害，後悔就無謂啦。
《瘦身男女》：劉德華飾演肥華，為幫Sammi 賺錢減肥，甘願做人肉沙包。臨床心理學家Dr.Paul 話：「雖然殘忍同唔人道，但呢個都係最有效消除怒氣嘅方法，打拳啦，出一身汗，又可以減壓。」
■打打打打，打係宣洩情緒好方法，但打人犯法、打自己戇居，當水係仇人咁打，包你一身舒服晒。
