Rapper 組合農夫歌詞有句：「打和打和和過和仔！」現年四十有一的和仔，年頭對外界宣佈踢完今個球季，將會掛靴榮休。仍然記得這位三屆香港足球先生，在2000年代表香港打港澳錦標賽時，波餅怒「省」球證，八年後重歸母會東方做球員兼教練，再度「兇」球證，最後換到紅牌出場。縱橫球壇二十年，有起有跌，有「香港碧咸」之稱的李健和歷盡千帆過後，依然人老心不老，名和心不和，男人四十，依然有火！
記者：蒙為亮
攝影：譚盈傑
profile
■和仔坦言：脾氣呢樣嘢，唔會因為年紀大就會變好！
李健和1967年出生，85年加入東方，司職右中場，曾效力球隊還有麗新花花、麗新、南華、晨曦及華家堡，球員生涯超過20年；93、94及03年三度奪得「香港足球先生」，也曾任香港隊隊長一職，07年任香港足球代表隊主教練，現任東方球員及教練。和仔獨有的icon 長髮造型，二十年不變。
■當年「左倫右李」，死火倫（右二）的單刀橫傳，加上和仔（左二）的底線傳底，已成球壇經典。
■六年前南華奪得銀牌總冠軍，昔日的南華名將都不在隊中了。
■底線快放是和仔必殺技，但他笑言：「而家年紀大，想快都快唔到。」
見證男子組興衰 1985年首次為東方披甲上陣，一年後，立刻協助球隊捧走高級銀牌賽冠軍。當時這個「長毛仔」只有18歲，回想當時球壇正是百花齊放之時：「當年的球賽一直都有捧場客，一有大戰如南華對東方，精工對花花，過多幾年有快譯通對好易通，都是全場爆滿的。當時外援的質素很高，譚拔士、希福特、威拿等，簡直是球場icon 。此外，當時香港的球員對自己要求也很高，除了體力，我哋技術上都唔一定輸畀外援。」還記得南華勝利十一人的年代，「左倫右李」的歐偉倫、李健和都將會退下火線了，丘仔丘健威去了公仔箱講波，譚拔士去了博彩公司做PR ，山度士就去了拍桑拿廣告，走的走，轉戰的轉戰，也許這些畫面，只可以在照片重溫。說到這里，欷歔和慨嘆「蜀中無大將」之餘，和仔卻說這些戰友的情誼真係記一世：「踢波踢咗廿幾年，真係有好多好朋友，無論轉隊，上山落山，大家都係踢波！」「場內無朋友，場外飲杯酒」，有空和仔更會和一班波友，一齊吹吓水，飲番杯，不禁令人想起林海峰《男子組》的歌詞，「有啲嘢男人會放喺心入面。」
經典一「省」
■和仔說，現時他是過簡單的生活，踢快樂的足球。
2000年5月28日對於李健和來說是一個受難日，一時之氣，用波「省」球證，除了令他的職業足球生涯蒙上了污點，也為他帶來停賽一年的懲罰，如果現在時光倒流，究竟和仔仲會唔會同樣一「省」呢？「你而家問我，一定唔會，不過如果當時問我一定會，衝動，往往只在一瞬間，有時你問一啲想自殺嘅人，叫他靜落嚟諗一分鐘，他一定會打消呢個念頭，我自己都係一樣。」小記打斷李sir ：「但係你上個月又兇球證喎！」他立刻大笑：「脾氣呢樣嘢真係改唔到，唔會因為年紀大，就會脾氣變好，根本無可能！」就是這種依然故我的態度，小記反而覺得和仔很有性格，還記得當時小記在電視上見證和仔「省」球證一幕，震撼情況有如巴士阿叔事件，表面政治正確人云亦云一定予以批評，不過問世間又幾多憤世嫉俗的朋友是口不對心，其實心里暗地像旺角球場的阿叔高呼：「和仔，『省』得好！XXXX ……」這一記快狠準的波餅，的確是在眾多香港球迷心目中的經典畫面。
波並唔係咁踢！
在這二十多年間，踢過東方、花花、南華、晨曦、華家堡，由青年軍，踢到做教練，問到和仔以前踢波同現在的年輕球員有無不同，和仔直言簡直係天淵之別：「以前我哋踢波簡單好多，做一個職業球員，只需要專心踢好波，每日晨操晚練，所有精神都放喺比賽贏輸入面，新一代嘅球員，又要做宣傳，又唱歌，又要上堂，足球以外還有其他其他，令佢哋唔可以真正專心踢波！」無錯，就算香港的足球不是標榜商業掛帥，但在一個商業社會，一切也會慢慢變質，足球也不例外。李健和更補充，現時的球員在心態上也有一定分別，身為教練的他對這個情況自然十分清楚：「以前我哋踢少林寺歐偉倫雖然做前鋒，但都會搏晒命去飛「剷」搶波，鄭少聰有時也會賣弄一下南美腳法，娛樂大家，但而家新一代唔好話飛「剷」，連叫佢走多兩步去撲波有時都費事理你，舊時我哋跌低咗第一時間起身追番個波，而家佢哋會立刻拍吓條褲，睇吓有無污糟，腳法更加唔好講啦！不過而家時代同制度都變啦！以前踢波好似好巴閉，有好多球星，而家球隊多，但星味欠奉，所以真心希望新一代的球員，可以對足球更加認真。」至於和仔人生中最難忘的比賽，首選大球場翻新後的第一場比賽東方對森多利亞：「當時真係輸波贏氣氛，因為那是首次大球場全場爆滿，打氣聲真係好似踢緊英超。」
快樂足球唔使愁
■東方球員大讚李sir ，認真時認真，遊戲時遊戲，是教練的典範。
有球迷認為今年香港「足運」將會有轉機，首先有班主用百萬大軍打造南華軍團，而且參加球隊更增至13隊，有新鮮感之餘，亦能擴闊球迷基礎，帶來固定捧場客，也有老球迷批評太多球隊反而會質素參差，對此和仔依然是一貫的樂觀：「我哋唔應該只係一路回顧，以前幾咁好，入場人數又好，水準又高等等，努力往前看，才是積極嘅方向，今年球圈其實OK 㗎，老牌球隊南華、東方、愉園、傑志依然主導，供年輕人培訓的地區球隊也慢慢崛起，和富大埔而家更加高踞榜首，而且大陸的球隊，好似香雪上清飲，謝菲聯等都可以參加本地甲組聯賽，百花齊放之餘，又可以多做青訓工作，所以我自己真係唸唔到有咩唔好。」講到青訓，其實李健和對此也是不遺餘力的，上年執教華家堡，今次就返回母會做球員兼教練，球場各人都尊稱他李sir ，訪問期間李sir 就是盡心盡力的教波，全程享受在其他球員有講有笑的操練之中，和仔就坦言對教練這份工作十分enjoying ：「教波真係好開心，有時見到啲後生跑跑跳跳，感覺好有活力，而且有時見到佢哋踢得好，自己都會好有成功感，年紀大咗同以前自己做球員嘅心態，真係有好大改變，今年掛靴之後自己主力都會繼續做青訓同教練嘅工作。」無可置疑，李健和這個名字是本地球壇的經典，最後李sir 說：「而家每天十點起身食早餐，做運動，之後搭船出香港練波，練到五、六點，無比賽的話，就搭船返坪洲陪老婆仔女。」簡單的生活，快樂的足球，已令這位香港球壇「長毛」笑得心足。
歷史重溫!
■李健和為人津津樂道的經典，「省」球證連環圖，已寫進香港球壇歷史。
李sir 嚴選球壇接班人
南華10號歐陽耀沖中場
和仔：「歐陽耀沖上季踢華家堡已經覺得他好有天份，而且勝在夠後生，肯搏肯跑，踢法也有啲似當年的自己，作為中場大腦十分稱職。」
東方17號葉鴻輝守門員
和仔：「呢個小朋友，18歲就已經好有守門員觸覺，不過技巧方面仍有待改進，假以時日一定會成為新一代的豬仔（范進業）！」
戰友論和仔
丘健威（好友兼前港隊隊員）：「和仔應該收收火，專心教波，做個好教頭！其他嘅大家心照啦！」
何輝（同期出道兼前港隊隊員）：「好欣賞和仔，無邊幾個好似佢依然咁有恆心同熱誠喺球埸上打拼，但老老實實真係要收收火啦！做教練要有好身教。」
■即使即將掛靴，但香港球迷還是會間中吹水講番和仔的「底線傳底」（當然少不得歐偉倫的「單刀橫傳」！）
