愛連身裙多於旗袍，愛吃法國荷包多於叉燒包，一切一切都可見港人崇洋的心態，就連老外鬼節也比七月十四玩得瘋狂，除了Ocean Park 同Disney 大搞Halloween gimmick 之外，各大小商場也用上代表哈佬喂的特定icon 南瓜、女巫等佈置每個角落，講真有點老套，要應節未必一定要著到古靈精怪入主題公園，入墳場一樣可以好「鬼」箋。
記者：蒙為亮
攝影：林柏鈞
導賞傳奇墓碑不像一般的高街鬼屋探險，元朗娛苑突入等，墳場導賞通常日光日白進行，所以驚嚇欠奉，但卻別具文化意義，活動由聖雅各福群會的社工劉李林舉辦，堪稱「香港墳場導賞第一人」，他坦言墳場沒有甚麼恐怖，反而每一塊墓碑都是一頁頁的歷史書，「自己搞墳場導賞，都搞咗三年有多，表面是一個純Gimmick 嘅概念，但其實我想透過導賞團令更多新一代香港人了解本土歷史文化，要坐定定上一堂歷史堂，大家一定悶到抽筋，反而邊學邊玩，學生會更受樂，更容易吸收。」
訪問當日，劉sir 選定了香港數一數二大的跑馬地基督教墳場作導賞地點，內容包括墓碑簡介和野外定向兩部份，更會為學生們設下一些謎題，讓他們思考墓碑與先人之間的關係，「呢度埋葬嘅先人，生前都係有權有勢達官貴人，或是生於大富之家，其餘都係外國士兵，平民百姓絕不會葬喺呢度，所以每個碑背後都有自己嘅經歷同故事，例如，呢個就係第一代香港傳教士郭士立牧師之墓，雖然佢享年48歲，但係佢一生都充滿傳奇和爭議性，因為佢一方面熱心傳揚福音，但另一面又協助賣鴉片，而且佢識得多國語言，所以也有傳佢係一名間諜，當時負責向英國政府通風報信，身份亦正亦邪，的確眾說紛紜。」
郭士立牧師之墓
他一面傳福音一面又協助賣鴉片，可說是第一代「無間道」。
香港第一貪官墳場一碑一故事，接著劉sir 又指著另一邊為小記補課：「不過講到神祕，一定必數這位『香港第一貪官』高和爾，一望上去已是一個淺藍色的共濟會標記，有睇《達文西密碼》的朋友，應該對『共濟會』這個名字不會太陌生，高和爾就是其會員之一，不過根據歷史解說共濟會只是一個由木匠，建築師等成立的一個屬會，應該不太像電影中講述的神秘迷離吧！」更有趣的反而是高和爾的生平，「佢係一個混血兒，1840年隨英軍來港，官場智慧甚高嘅佢曾任華民政務司，但喺任內佢包娼庇賭，貪贓枉法，可見喺五十年代香港嘅吏治真係十分敗壞。」
■「香港第一貪官」高和爾之墓
■墓碑上明顯刻了圖案圓規加上角尺的共濟會標記。
揭開密碼中的密碼
一路上劉sir 表示每個墓碑只要仔細觀察你會發現有更多鮮為人知的secret code ，「例如呢個看似十字架又非十字架嘅墓，唔係基督教或是天主教嘅墓，先人乃是信奉東正教，而其他墓碑刻上嘅圖象亦有特別意義，如士兵墓上有一隻鷹，你會知道他是一個空軍士兵；有支大炮，是炮兵；但那有條蛇繞著一個十字架又是甚麼意思呢？」面對劉sir 的提問小記當然「O 晒嘴」，胡亂答了是牧師軍師，答案原來是軍醫。「蛇喺西方社會中代表有毒嘅嘢，如疾病，傷患等，十字架就帶制服同醫治之意思。」
原來士兵墓都分兩種，剛才提及的是個人墓，規模較大則為集體墓，隨時有幾個人咁高，「呢個就係為當時喺第二次鴉片戰爭中，為桑普森號死去嘅20位士兵而立嘅集體墓，其實四，五十年代醫學仍然落後，好多士兵來港後因為水土不服而死。」但是為甚麼碑上的柱會斷開兩截呢？是給雷劈斷？劉sir 立刻笑著解釋：「斷柱係代表佢哋壯志未酬，出師未捷身先死，唔係天然而係經人手打磨過。」的確細路仔唔識世界，想不到一個墓碑也是如此有趣。
最後，劉sir 勸大家一句：「其實一般嘅墳場會喺旁晚6、7點關門大吉，始終墳場都係「有規有矩」嘅地方，你都唔會想半夜有人嘈住你
覺。」本人自認膽小，夜晚都係去全城哈佬喂同黑色世界玩算了。
1.劉sir 十足現代講古佬，全個導賞過程沒有半分鐘dead air ，令小記和攝影哥哥都十分佩服。
2.個人認為這是整個跑馬地基督教墳場內其中一個最「靚」的墓碑，手工精細得像一件雕塑，那條鎖鏈就如聖鬥士的阿舜一樣。
3.墳場內少有的中國人墓碑，不論手工或設計上都較為平實。
4.一艘戰艦的集體墓，detail 位很多，首先是炮頂的人工損毀，代表非戰之死，其次是中間的「炮形圖案」，表示以炮兵居多，最後下方密麻麻的名字，就是死者的名單。
5.其實墓碑上天使雕像的手勢也有其獨特的意思，例如天使指上天即代表天國近了，天使吹號則帶有警世的訊息。
6.天使安睡就是安息主懷之意，圖中所見是一個小朋友的墓碑，小天使正睡得安詳。
聖雅各福群會墳場導賞團
查詢電話：35833307
網址：
http://www.sjsys.org/ole/ssp001.html
「阿一」有陰陽眼
■阿一話自細有陰陽眼，見到好多人睇唔到嘅嘢。
《同事三分親》的阿一在美國長大，本身是「鬼」外，原來佢自小亦同「鬼」結下不解緣，「我自己好細個過陣已經可以睇到鬼，唔止我一個，成班朋友中，有幾個朋友都同我一樣，所以大家都不知不覺習慣咗，不過我差不多十六歲時，上個friend 屋企玩，玩玩吓聽到隔籬有個小朋友尖叫，我同其他三個有鬼眼嘅朋友透過玻璃窗望去隔籬屋，見到一嚿黑影，大家當堂成個人呆晒，原來有隻黑色無手嘅鬼想食個小朋友，之後我哋趕到落去，隻鬼抱住個小朋友走咗，當時真係好驚！其實而家我住紅磡都見到好多鬼，可能因為近大酒店，不過都習以為常啦！」無手鬼食小朋友的確很詭異，但小記覺得阿一全程廣東話對答如流，連「習以為常」這些四字成語都識得用，反而更詭秘。
「畫」破生死創意墓碑展有無諗過自己塊碑貼住自己最鍾意Idol 的poster 呢？有無諗過人未死，先為自己立墓碑呢？幾位Artists 連同40位城大創意媒體系學生，嘗試未出發先興奮，人未死先立墓碑。各人都發揮最大創意，將數碼港變身墓園，立下一個又一個creative 墓碑，所謂做戲做全套，活動除了有墓碑設計之外，更有數碼靈堂，的確搞「鬼」。
Artists 作品：
「生命碰撞的力與美」
多媒體創作人張志中：「我用上鮮藍色和白色羽毛，帶出死亡都可以好夢幻。」
「My Dominoes 」
新進藝術家王無姿：「我用上百塊迷你墓碑做成骨牌，用骨牌來比喻人生苦短的確最好不過。」
「阿牛的墳墓」
本地藝術家王天仁：「大半世人做牛做馬，賺到的最後也是萬般帶不走，所以倒不如活在當下！」
學生作品：
學生朱喬欣
顯而易見諷刺結婚是戀愛墳墓，彷彿在上演馬騮戲，全是為做畀人睇。
學生Claire
香港寸金尺土，為了慳錢慳位，20年後的墓碑隨時變成「易拉架」，連去墳場的交通費都慳番﹗
學生潘韻怡
「蕉公之墓」叫人做個好男人，記得用杜雷斯，意識大膽之餘，更是創意無限。
「鑄碑‧立誌」萬聖節藝術展覽
日期：即日至10月31日
地點：數碼港商場三樓
查詢電話：31663111
網址：
http://arcade.cyberport.hk 
