如果，你自問是一個有經濟能力又貪靚兼鍾意「濕平」的時尚女子，咁，就應該留過唔少腳毛在I.T 。
一個字號的成功，除了要老闆有計，買手揀貨好睇，仲要有人，睇得做得talk 得，方可水到渠成；這間本地至潮大型時裝連鎖店，除了有個靚老闆娘，亦有班生得好唔錯的女下屬，出心出力長期作戰，其中一個，就係這位穿衣之道貴乎非黑即白的傳訊經理Gloria Yu 。
Why White ？
我認識Gloria 六年，她的穿衣之道一直都是「穩中求勝」，所以黑的居多，白的為次，這可能是年少時經歷無數花喱花碌之後，沉澱下來的結果。「F.1學溜冰，識咗一班貪靚精，有樣學樣走去買條工人褲，為免同人哋一樣，我特登買條朱古力色撞棗紅嘅牛仔布款；再大啲，將第一次暑期工賺嘅錢，全數買咗一對紫色Nike 。」又紅又紫，試問人大了，點頂呀？
I.T是Gloria 第一份工，一做七年，為過不少歐、日品牌在港打響名堂，對於名牌，她說：「係一種service ，裡面的環境、服務以至氣氛都予人一種被重視及與別不同的感覺，所以吸引。」
A.P.C.、LIMI feu 是舊愛，今日則Paule Ka 、YSL 、D&G 和新寵G.V.G.V.，鍾情一世的，大概就是MMM 和AnnDemeulemeester ，「每個階段喜好不同，不過，真係以黑、白色居多，當中又覺得白色幾女仔；我以前比較中性，自舊年興skinny jeans 起，發覺襯高踭鞋原來好有女人味，就愈來愈鍾意女性化打扮。」
Why Black ？
「我係獨生女，唔鍾意同人分享，憎死同人撞衫。」Gloria 的抗「憎」行動，包括讀書時勒實肚皮買細一個碼的校服裙、將一條新簇簇的紅格仔裙漂到舊舊哋vintage feel ……小學一年級的農曆年，粉紅色leggings 外罩一對波點襪，由初一著到初七周圍去拜年，街坊問：「你搞乜？」她答：「我唔想著到個個一樣。」我服！
反觀，今日黑白雙煞的局面，想唔悶，可以點？「揀多啲draping 和volume 重嘅設計，cutting 更立體，而呢類衫，好少出錯。」除了白，她亦會滲入一點灰、銀、銅灰、銅啡等去配黑。
「我心情唔好時尤其愛著黑，但你要知道，全身黑色反而最易出事，譬如黑衫黑褲就千祈唔好再襯對黑鞋，我會加番條有顏色嘅scarf ；仲有，黑色skinny jeans 唔好襯平底鞋，又老又會令到下盤睇起來好肥壯㗎！」
見盡靚衫靚設計，Gloria 始終對日牌忠心耿耿，係咪工作影響品味？「應該係老闆眼光好，入到好牌子，雖然佢冇規定員工一定要著公司牌子，但買買吓又總有幾件掛上身。」心甘命抵，咪咁解囉！
「我一向鍾意LIMI feu 嘅衫，呢件睇嚟平凡，其實背脊有個大結。」
「我搵咗好耐至搵到呢條唔太似Tsumori Chisato 大路設計嘅淨色裙，我要佢嘅少女味，又唔想太cute 太天真咁款，呢條啱晒。」
「See by Chloe 白色喱士直身裙，好girly 又elegant ，夜晚去食飯最啱。」
「MMM 黑色魚網罩白色半截裙，設計特別，但未著過，暫時亦未諗到點襯。」
