別被熱辣辣的天氣瞞騙，踏入農曆八月，理應是秋分之時，離乾燥清爽日子不遠矣，唔信？人體器官─皮膚，最唔識講大話，特別轉季日子，一旦照顧唔妥當，缺水、甩皮、敏感泛紅，甚至出油爆瘡等慘不忍睹情況統統現眼前。要對付季節性皮膚問題，一句講晒：對號入座最重要！
問題1 [龜裂甩皮
徵狀：痕癢、紅腫，隨之而來皮膚乾到[龜裂，俗稱的「爆拆」。
原因：皮膚缺水，沒有適當的護理，特別係乾性及混合性皮膚最常見。
護理：入秋後敷保濕面膜的次數要增加，最好揀含透明質酸（hyaluronic acid ）、乳酸（lactic acid ）、甘油（glycerin ）及尿囊素（urea ）等醫學界亦一致認可的保濕成分。
即時急救：如鼻尖及鼻翼位置甩皮，上妝前先用熱毛巾敷面，軟化死皮後再輕輕捽走，然後以1:1比例混合粉底及保濕乳液，改善情況。上粉後仍有一撻撻，可用粉撲沾上粉底液後輕印在甩皮位置，千祈唔好用力捽。
A Perfect Potion Replenish Face Mask $550/50g
成分：生育酚、可可巴及迷迭香精華油等。
保濕度：★★★
酸鹼度：pH5
美容顧問Samantha 評語：敷後皮膚變得柔軟滋潤，事後無搽護膚品，亦沒有繃緊感覺，尤其岩成熟皮膚。
B Exuviance Rejuvenating Treatment Masque $560/75ml
成分：氨基酸、乳糖酸及蘆薈精華等。
保濕度：★★★★
酸鹼度：pH5
美甲師Ivy 評語：標榜專為敏感皮膚人士而設的保濕面膜，試後皮膚確實滋潤了，但紓緩敏感呢卻未見特效。
C Laura Mercier Hydra Soothing Gel Mask $285/ml
成分：尿囊素、甘菊及青瓜萃取物等。
保濕度：★★★★★
酸鹼度：pH5
化妝師Janice 評語：保濕效果成績最好，敏感的紅腫情況都減輕咗，用前先放入雪櫃，冰涼感覺會更relax 。
D Ultra Ceuticals ACE Hydration Booster $600/75g
成分：乳酸、透明質酸及甘油等。
保濕度：★★★
酸鹼度：pH5
空姐Sara 評語：保濕效果一般，勝在可以敷過夜，敏感懶人救星！
E Fresh Black Tea Mask $880/100ml
成分：黑茶、清酒及墨西哥馬鈴薯萃取物等。
保濕度：★★★★
酸鹼度：pH6
市場策劃Ada 評語：保濕效果唔錯，敷後缺水情況有所改善，偏微酸性，正在唔刺激。
注：人體正常皮膚pH 值為5.5，愈接近表示性質愈溫和。
問題2 標油爆瘡
徵狀：皮膚感到乾爭爭，但又猛標暗瘡油脂粒，尤其T-zone 位。
原因：皮膚底層太乾，從而刺激皮脂線不斷大量分泌油分保護皮膚。
護理：最直接係補充皮膚水分，水分夠，油分自然唔會氾濫，成分最好以茶樹油等天然為主，以免皮膚再受刺激。
即時急救：用麻質面油紙吸油，膠質吸力太強，反而愈吸愈油，注意每日用兩次就夠喇！
A Bioderma Hydrabio Serum $398/40ml
成分：甘油、維他命PP 及木糖醇等。
保濕度：★★★★★
酸鹼度：pH5.5
化妝師DoDo 評語：聲稱含30億水分粒子及48小時non-stop 保濕，搽後確實好水潤，好似有層膜咁包住皮膚，保存水分，唔錯！
B Elemis Herbal Lavender Repair Mask $420/ml
成分：玫瑰、百里香及薰衣草精華油等。
保濕度：★★★★
酸鹼度：pH6
經紀Pinky 評語：成分天然，具平衡油脂功效外，仲深層清潔，減低生暗瘡的機會。
C Mukti Sebogel $369/65ml
成分：薰衣草純露、天竺葵及茶樹油等。
保濕度：★★★
酸鹼度：pH 5
售貨員Winnie 評語：直接塗於暗瘡患處，啫喱質地性質溫和，具消炎作用，唔似一般暗瘡膏般
乾皮膚。
D Murad T-zone Pore Refining Gel $460/50ml
成分：甘醇酸、亞麻油酸及石榴萃取物等。
保濕度：★★
酸鹼度：pH 4.5
護士Cathy 評語：啫喱質地清爽，搽後皮膚matt tone ，即時令油脂分泌減少，但保濕效果一般，幫唔到敏感標油。
問題3 缺水乾紋
徵狀：夏天皮膚仲好哋哋，入秋後突然變得乾燥，成日繃繃緊。
原因：秋風中的空氣濕度少，令皮膚表面的水分被快速抽乾，加上油脂分泌減弱，面頰位因此變得乾燥紅噹噹。
護理：洗面後，趁皮膚仍濕潤時，立刻搽具保濕及滋潤成效如維他命原B5，滋潤性強的荷荷巴油（Jojoba oil ）的保濕面霜，鎖住水分。搽得過多過厚會阻塞毛孔，容易谷酒米暗瘡；應少量搽多幾次。
即時急救：以2:1:1的配方將麵粉、蜜糖及牛奶敷面約15-20分鐘，又或隨身帶備一支保濕噴霧或花水，當皮膚感到繃緊時噴一噴，都有即時紓緩效果。
A Darphin Intensive Moisturizing Serum $580/30ml
成分：石榴及奇異果精華等。
保濕度：★★★★
酸鹼度：pH5.5
理財顧問Chloe 評語：液狀質地涼浸浸，搽後即時吸收晒，清爽水潤，淡淡的花香味仲好relax 添！
B Skin Lab Super Hyaluronic Moisturing Milk $120/140ml
成分：透明質酸
保濕度：★★★★
酸鹼度：pH5
教師Cuby 評語：清爽水潤，長時間用都唔膩，勝在售價平，超抵用！
C Pattrena Moisturizing Cream $180/100g
成分：洋甘菊、蘆薈及薰衣草萃取物等。
保濕度：★★★
酸鹼度：pH5.5
公關Fiona 評語：乳霜質地一推化成水狀，「手感」好保濕，潤而不膩，即時紓緩咗繃緊。
D Clarins Aqua Essence Morning Energy $350/100ml
成分：可可豆、白茶及紅醋栗等。
保濕度：★★
酸鹼度：pH5
秘書May 評語：淡淡花香味，水狀質地吸收快，噴於掌心然後輕拍在皮膚上，搽完皮膚無太大負荷，可惜唔夠滋潤保濕。
E Menthoderm Skin Plumper $820/30ml
成分：多鏈及超微球狀載體導入粒子
保濕度：★★★★★
酸鹼度：pH6
平面設計師Esther 評語：乳液質地清爽、滲透快，搽後好似幫皮膚大量泵水咁，pH6偏微酸性仲好岩敏感皮膚用，具紓緩繃緊及降紅功效，正！
F IPSA The Time Reset Essence $600/30ml
成分：三甲基甘氨酸、茉蕎蘭精華及玫瑰精華等。
保濕度：★★★
酸鹼度：pH6
美甲師Ivy 評語：質地清爽，易吸收，搽後皮膚乾紋唔見咗仲有番光澤。
問題4 發紅過敏
徵狀：皮膚出現突發性敏感，雙頰位置廣泛紅點或現紅筋，甚至會紅腫及痕癢。
原因：受到突如其來的一熱一冷空氣，或空氣中的相對濕度乾燥氣候夾攻，皮膚一時間適應不來所影響而產生敏感。
護理：含香料、酒精、重防腐劑等成分的護膚品，通通唔掂得！最好揀偏微酸性（pH 值以5.5為標準）或標明敏感皮膚專用的產品，如有強效調節水分功效的醣醛酸（Sodiumhyaluronate ）或氨基酸（Aminoacid ）等。亦可搽含天然植物精華成分為主的精華素，如玫瑰、洋甘菊及蘆薈等，能紓緩及鎮靜皮膚。
即時急救：可用冰袋敷面，或用凍水洗面，在未完全抹乾水分前即刻薄薄搽一層凡士林，能紓緩及鎮靜皮膚。
A Bicelle B5Moisturizing Cream $710/50g
成分：透明質酸、維他命B5及荷荷巴油等。
保濕度：★★★★
酸鹼度：pH6
化妝師DoDo 評語：偏微酸性潤而不膩，塗抹後有即時強勁保濕效果，具紓緩及鎮靜敏感皮膚泛紅情況。
B Jurlique Biodynamic Beauty Serum $740/30ml
成分：黑接骨木、甘草及雛菊等。
保濕度：★★★
酸鹼度：pH5.5
平面設計師Esther 評語：水狀質地搽上面變乳液，夠晒滋潤，加埋多種植物精華成分，紓緩突發敏感情況，即刻見功。
C Guerlain Serum SOS $560/30ml
成分：純金、海藻精華及百合精華等。
保濕度：★★★★★
酸鹼度：pH5
化妝師Janice 評語：有時嘅model 皮膚乾到發紅，我都會幫佢先搽呢支嘢打底，然後再上base ，有唔錯即時嘅降紅功效㗎！
D Exuviance SkinRise Morning Bionic Tonic $700
成分：乳糖酸、薄荷及青瓜精華等。
保濕度：★★★★
酸鹼度：pH5.5
售貨員Winnie 評語：片裝可以直接抹面或敷於重災區位置，涼涼哋感覺對即時降紅止痕好有效，急救最岩。
E NeoStrata Bonic Face Serum $690/30ml
成分：乳糖酸、維他命C 及E 等。
保濕度：★★
酸鹼度：pH4.5
會計師Janice 評語：膠水狀質地杰身，平時用有少許黏膩，但到敏感及去天氣極乾燥的地方補給用就一流。
F Swiss Perfection Cellular Moisturizing Day Cream $1,140/30ml
成分：馬尾草萃取精華、鳶尾草活細胞及夏威夷果仁油等。
保濕度：★★★
酸鹼度：pH6
空姐Sara 評語：潤身，冇香味，且具調節皮膚表皮層pH 值，本身皮膚好易現微絲血管，用後紓緩咗，最岩皮膚薄人士。
